image image image image image
د دولت په ګټه د ۳۶ زره جریبه دولتي ځمکو د قضییو حلول
عدلیې وزارت د ۱۳۹۳ مالي کال له پیل څخه د ۱۳۹۶ کال د غبرګولي د میاشتې تر وروستۍ نېټې پورې د ۳۶ زره جریبه دولتي ځمکو، څه باندې ۶۹ میلیونه امریکایي ډالرو او له ۲ میلیارده او څلور سوه میلیونو زیاتو افغانیو په ارزښت یو شمېر قضیې د دولت په ګټه فیصله کړي دي. عبدالبصیر انور، د عدلیې وزیر، چې د شنبې په ورځ د روان کال د لړم په ۱۳ مه نېټه یې د حکومت د اطلاعاتو او رسنیو په مرکز کې د یوه خبري کنفرانس پر مهال د دغه وزارت د لاسته راړونو په اړه خبرې کولې زیاته کړه: د ۶۷۵ بابه دکانونو، ۳۰ کورونو، ۸۶۷ حقابو، ۴۸۲۰ لېتره ډیزلو، ۲۵۰۰ لیتره پترولو او ۱۳ زره یورو په ارزښت اړوند قضیې یې هم د دولت په ګټه فیصله کړې دي.
د ښاغلی انور په خبره، عدلیې وزارت تر دې مهاله ۶۵ سیاسي حزبونه او ۲۹۴۰ ټولنیز بنسټونه ثبت کړي دي، چې سیاسي حزبونو، ټولنیزو بنسټونو، عریضه لیکونکو، د معاملاتو د لارښونو دفترونو ته د جوازونو د ورکړې له لارې یې ۴۱ میلیونه او ۲۱۲ زره افغانۍ تر لاسه کړي دي.
له انساني قاچاق سره د مبارزې په برخه کې هم دا وزارت د پام وړ لاسته راوړنې لري، چې مهم یې د کډوالو او انساني قاچاق سره د مبارزې د قانون تعدیل او اصلاح او دامنیتي ادارو لخوا د ۱۴۹۲ تنو انساني قاچاقبرانو نیول او قضایي ارګانونو ته د هغوی سپارل دي.
د عدلیې وزیر وویل، تر دې مهاله ۴۰۵ تنه د انساني قاچاق په تور محاکمه شوي او د انساني قاچاق ۱۱ زره او ۲۷۷ تنو قربانیانو ته د عامې روغتیا، کار او ټولنیزو چارو وزارتونو لخوا د کاري فرصت زمینه برابره شوې ده.   
د عدلیې وزیر همداراز وویل، د ملي یووالي حکومت له پیل څخه تر دې مهاله د بګرام د عدلي او قضایي مرکز په ګډون د هیواد په کچه په عدلي او قضایي ارګانونو کې د څه باندې ۲۲ زره بې وزلو تورنو کسانو له حقونو څخه دفاع شوې ده، چې له دې جملې څخه ۲۱۸۰ تنو برائت تر لاسه کړی دی. هغه همداراز په یاد وزارت کې د (۱۸۸) په تیلیفوني شمېرې د حقوقي مشورو د ورکړې د مرکز د رامنځته کولو خبر ورکړ او ویې ویل: چې تر دې مهال ۵۰۷ هیوادولو تیلیفوني اړیکې ځواب او حقوقي مشورې ورکړل شوي دي.   
###
د مخدره توکو پر وړاندې د همغږې مبارزې په موخه د سیمه ییزو کارپوهانو ناسته
د سیمه ییزو کارپوهانو کاري ډلې ناسته نن دوشنبه د تلې ۱۷مه له مخدره توکو سره د مبارزې په موخه جوړه شوه.
د مخدره توکو د قاچاق، کښت او تولید په موخه د ګډو همکاریو پيژندل، د سیمه ییزې کاري ډلې جوړول، د مخدره توکو پر وړاندې د سیمه ییزې استراتیژۍ وړاندې کول، د بدیل معیشت د بریالیو موډلونو شریکول، د کرنیزو محصولاتو لپاره د ګډ بازار رامنځته کول او د سوداګریزو بندیزونو لرې کول د دې ناستې له مهمو موخو څخه شمیرل کیږي.
مخدره توکو سره د مبارزې وزارت د پالیسۍ او همغږۍ مرستیال جاوید احمد قایم د ناستې ګډونوالو ته وویل، چې نا امني د کوکنارو کښت او تولید ته زمینه برابروي. خو د ده په وینا که چیرې د سیمې هېوادونه له مخدره توکو سره د مبارزې په برخه کې مرسته وکړي، کولای شي، چې د مخدره توکو د تولید، کښت او قاچاق پر ستونزو بریالي شي.
نوموړي زیاته کړه، چې د مخدره توکو پر وړاندې مبارزه چې د افغان دولت د استراتیژۍ اصلي موخه ده په خپلو کې همغږي، سیاسي ژمنې او تعهدات او د مخدره توکو په وړاندې د سیمې د هېوادونو ګډه همکاري په بر کې نیسي.
د تاجکستان د جمهوري ریاست د مخدره توکو د اژانس مشر سیف الله ظفرزاده د ناستې ګډون والو ته وویل، د دوی څېړنې ښيي چې په افغانستان کې د ۲۰۱۳ کال په پرتله په ۲۰۱۶ کال کې د مخدره توکو تولید، کښت او قاچاق راټیټ شوی دی.
د مخدره توکو پر وړاندې مبارزه کې د سیمه ییزو لوړپوړو کارپوهانو ناسته کې مخدره توکو سره د مبارزې اړوند دولتي ادارو او د ایران، تاجکستان، پاکستان، هندوستان، متحده عربی امارات، ازبکستان، ترکمنستان، روسیه، چین، ترکیه، قرغزستان، قزاقستان هېوادونو استازو پکې ګډون کړی ؤ پدې برخه کې به خپل وړاندیزونه او تجارب شریکوي.
د کلیوپراختیا او بیارغونې وزارت لخوا په وروستیو ۳ کلونو کې د پراختیایي پروژو له لارې څه باندې ۱۱ ملیونه کلیوال برخمن شوي دي
همداراز دغه وزارت په وروستیو ۳ کلونو کې د ۹۱۶ ملیونو ډالرو په لګښت ۴۰ زره او ۹۶۷ پروژې
پلې کړې دي.

اکبر رستمي د کلیو پراختیا او بیارغونې وزارت ویاند په هغه خبري ناسته کې، چې یکشنبې د تلې میاشتې په ۱۶مه د حکومت د اطلاعاتو او رسنیو په مرکز کې جوړه شوې وه وویل، چې د کلیو پراختیا او بیا رغونې وزارت په تیرو ۳ کلونو کې ۱۱ملیونه او ۳۲۵ زره کلیوال چې ۶۶۹ کلي، ۳۸۱ ولسوالۍ او ۳۴ ولایتونه پکې شامل دي له دغو پروژو څخه برخمن شوي دي.

د نوموړي په وینا د سړک جوړونې په برخه کې ۷ زره ۹۵۵ پروژې بشپړې شوې، چې ۲ ملیونه او ۷۰۰ زره کلیوال به له دې وروسته صحي مرکزونو، ټولنیزو خدماتو او ښار ته لاسرسی ولري.

د ده په وینا د ملي وحدت د حکومت په ۳ کلونو کې ۲ ملیونه او ۹۰۰ زره کلیوالو ته د څښاک صحي اوبو ته د لاس رسي اسانتیاوې برابرې شوې دي.

رستمي دغه راز وویل، د ۳ ملیونه او ۶۰۰ زره بزګرو او بڼوالو لپاره د بنسټیزو تاسیساتو په جوړولو سره د هغوی په محصولاتو کې د پام وړ بدلون راغلی دی.

رستمي وايي په تیرو ۳ کلونو کې ۴۹۹ ښوونځیو ته ودانۍ جوړې شوې دي، د ۳۹ ښوونیزو مرکزونو بنسټ ایښودل شوی او پدې موده کې ۲ روغتونونه او د ۶۲ کلینیکونو ودانۍ بشپړې شوې دي.
###
د ښځو چارو وزارت د درې کلنو کړنو او لاسته راوړنو راپور
دلبر نظري، د ښځو چارو وزیرې د سه شنبې په ورځ د حکومت د اطلاعاتو او رسنیو په مرکز کې د یوه خبري کنفرانس په ترڅ کې د خپلې ادارې د درې کلنو لاسته راوړنو په اړه مالومات ورکړل. هغې وویل، د ښځو چارو وزارت د یوې مهمې او کلیدي ادارې په توګه د ښځو پر وړاندې د تاوتریخوالی د له منځه وړلو، ښځو ته د کارموندې او د ښځو لپاره د حکومت پالیسي جوړونکې اداره ده، چې په تېرو درې کلونو کې لاسته راوړنې هم لري.
مېرمن نظري زیاته کړه: د حراست او عدالت غوښتنې په برخه کې له ۱۳۹۳ کال څخه د ۱۳۹۶ کال تر دویمې ربعې پورې د ښځو ۲۰۱۴۷ حقوقي قضیې، چې ۱۸۲۲۴ یې د تاوتریخوالي پېښې دي په وزارت کې ثبت شوې او له هغې جملې څخه ۵۱۸۶ یې د مصالحې او مشورو له لارې هوارې شوي او ۱۴۹۶۲ نورې یې عدلي او قضایي ادارو ته استول شوې دي.
د ښځو چارو وزیرې همداراز وویل، په مرکز او ولایتونو کې ۴۶۶۸ ښځې حمایوي مرکزونو ته ور پېژندل شوي، چې له هغې جملې څخه ۲۱۱۹ تنه یې د قضییو تر هواري وروسته خپلو کورنیو ته ستنې شوي دي.
دلبر نظري زیاته کړه، د یاد وزارت د عدالت غوښتنې پرمټ د زنداني ښځو په اړه د ولسمشرۍ ماڼۍ د ۲۵ فرمان له مخې په مجازاتو کې تخفیف را منځته شوی، چې له امله یې ۳۰۹ ښځې بښل شوي او د ۳۱۱ نورو په مجازاتو کې تخفیف راغلی دی. همدارنګه یو شمېر قوانین او اسناد لکه جزایي کود، د سکنجې قانون، د ملکیت د اسنادو مدني قانون، د جنسي زورونې او آزار د منعې قانون او د جندر له مخې د نکاحنامو رسمي سند او اصلاحي نظرونه اړوندو ادارو ته د تعدیل لپاره استول شوې دي.
مېرمن نظري له تاوتریخوالي سره د مبارزې او جندر د زیاتوالی په اړه وویل، د ښځو چارو وزارت د عدالت غوښتنې له امله په ۳۰ ادارو کې د ښځو د آزار او اذیت د منعې کمیسیونونه او په ۱۳ وزارتونو کې د جندر کمېټې رامنځته شوې دي. د ښځو چارو وزیرې زیاته کړه، چې د ښځو د اقتصادي رفاه او کارموندنې په برخه کې مهم ګامونه اخیستل شوي، چې په وینا یې ۲۳۷۰ ښځې په ولایت کې د پروموت رهبرۍ د پراختیا پروژې ته ور پېژندل شوي او ۱۷۰۰ نورې لیسانسه نجونې د پروموت پروګرام له لارې دولتي ادارو ته ورپېژندل شوي دي. د ۳۰۰۰ ښځو لپاره د هندوستان هیواد د سیوای پروژې له لارې د حرفوي زده کړو زمینه برابره شوې او ۲۲۲۸ محتاجې ښځې په خصوصي شرکتونو په دندو ګمارل شوې دي.
###
حکومت د افغانستان د ښځو د سوداګرۍ او صنایع د خونې له پروګرامونو څخه ملاتړ کوي
د افغانستان د ښځو سوداګرۍ او صنایعو عمومي خونه نن دوشنبه د تلې میاشتې لسمه د یوې غونډې په ترڅ کې چې د هیواد لومړۍ میرمن آغلې رولا غني، دولتي چارواکو، خصوصي سکتور او سوداګرو ښځو پکې ګډون کړی ؤ پرانیستل شوه.
د افغانستان ولسمشر محمد اشرف غني په یوه ویدیویي پیغام کې چې په همدې موخه خپور شو وویل، د افغانستان د ښځو د سوداګرۍ او صنایعو خونې د کار پیل، د سوداکړۍ، په برخه کې د ښځو په فعالیت کې نوی باب پرانیزي او پدې توګه سوداګرې ښځې دا وړتیا پیدا کوي، چې د کارموندنې، سوداګرۍ، پانګه اچونې او ځان بسیاینې په برخو کې خپلو فعالیتونو ته لا پراختیا ورکړي.
ولسمشر همداراز وویل، چې حکومت د ښځو سوداګرۍ او صنایعو د خونې له برنامو څخه ملاتړ کوي او په اقتصادي عالي شورا کې د دې خونې د استازو د ګډون په موخه مرسته کوي ترڅو د سوداګرۍ په برخه کې د ښځو ستونزې هوارې کړي.
د هیواد لومړۍ میرمن بي بي ګل غني، چې په دغو مراسمو کې یې ګډون درلود وویل، د افغانستان د ښځو سوداکرۍ خونې د کار پیل د دې ښکارندویي کوي، چې د سوداکرۍ او صنعت په برخه کې د متشبثو او پیاوړو ښځو شمير ډیر شوی او د سوداګرو ښځو د سترو فعالیتونو لپاره نیک او پیاوړی اقدام دی.
لومړۍ میرمنې همداراز زیاته کړه، چې د ښځو د سوداګرۍ او صنایعو د خونې پرانیسه نورې ښځې هڅوي ترڅو د اقتصادي بسیاینې په موخه هڅه وکړي او پدې توګه د نارینه و له اوږو هم د اقتصادي مسوولیت بار را کمیږي.
بي بي ګل غني ټینګار وکړ، چې مبتکرې ښځې د ټولنې د ملا تیر جوړوي او په سوداګرۍ او صنایع خونه کې د هغوی د فکر او تجربو بدلول کولای شي، د سوداګرو ښځو د ستونزو په هواري کې هم پوره مرسته وکړي.
په همدې توګه د ښځو چارو وزیرې آغلې دلبر نظري د ښځو سوداګرۍ او صنایع خونې پرانیستل او د رهبري هیآت ټاکل په اقتصادي برخه کې د ښځو د رهبرۍ لخوا ستر ګام وباله او د حکومت لخوا یې د ښځو د ملاتړ یادونه وکړه.
آغلې نظري زیاته کړه، چې اقتصادي برخه کې د ښځو ګډون مخ په ډیریدو دی، د حکومت او نړیوالو همکارانو لخوا هم د ښځو د پرمختګ او پیاوړتیا په موخه ځینې پروګرامونه په لار اچول شوي دي.
د ښځو چارو وزیرې په اقتصادي برخه کې د ښځو ګډون اړین وباله او زیاته یې کړه، چې د ښځو اقتصادي فعالیتونه د کورني تاوتریخوالي په له منځه وړلو کې هم ډیره مرسته کوي.
آغلې نظري ښځو ته د آسانتیاو د برابرولو په موخه د یوشمیر قوانینو، پالیسي ګانو او میکانیزمونو د لیکلو او رامنځته کیدو خبر هم ورکړ، چې کولای شي اقتصادي برخه کې د سوداګرو ښځو ستونزې په پوره توګه حل کړي.

چاپي خپرونې

  • خبرپاڼه


خبرپاڼه ۱۷ مه ګڼه

ویډیو

افغان او امریکایي پوځي چارواکي د افغان او امریکایي ځواکونو د ګډو عملیاتو په اړه د حکومت د اطلاعاتو او رسنیو په مرکز کې رسنیو ته معلومات ورکوي

 

faceBook icon twitter icon flicker icon youtube icon