د پاکستان د حکومت لخوا د ښځو او ماشومانو په ګډون د سلګونه افغان مهاجرینو د بند په اړه له غبرګونونو وروسته، بهرنیو چارو وزارت ويلي، د دغو کډوالو د ژر تر ژره خوشې کولو هڅې روانې دي.
د بهرنیو چارو وزارت ویاند ټینګار کوي، چې تر اوسه په کابل کې د پاکستان سفارت له چارواکو، د افغانستان په چارو کې د پاکستان له ځانګړي استازي او د دغه هېواد له یو شمېر نورو چارواکو سره په پاکستان کې د افغان کډوالو د ستونزو د اوارولو په اړه خبرې شوي دي او هڅه کیږي، چې دا ستونزه ژر تر ژره حل شي.
پر دې سربېره د بشري حقونو د ملاتړ یو شمېر نړیوالو ټولنو او د ملګرو ملتونو د کډوالو عالي کمیشنرۍ د بندو افغان مهاجرینو وضعیت اندېښمن کړي او د پاکستان له حکومت څخه یې د هغوی د خلاصون غوښتنه کړې ده.
د مهاجرینو او راستنیدونکیو چارو وزارت مرستیال محمد ارسلا خروټي ویلي: د افغانستان او پاکستان ترمنځ ستونزې باید د خبرو اترو له لارې حل شي. له ایران او پاکستان څخه زمونږ غوښتنه دا ده، چې د مهاجرینو پر مسلې سیاست ونکړي او د هغوی حقوق باید له نړیوالو او اسلامي قوانینو سره سم په نظر کې ونیسي.
د پاکستان د بشري حقونو ملي کمیسیون په یوه راپور کې ویلي، چې د کراچۍ د ښځو په زندان کې د نورو مجرمینو ترڅنګ ۱۳۹ افغان ښځې او ۱۶۵ ماشومان بندیان دي.
