د سوداګرۍ اوصنعت وزارت څرګنده کړې؛ په تېرو نهه میاشتو کې له افغانستان څخه ۱۵ هېوادونو ته د ۵۳ میلیون امریکایي دالرو پر ارزښت نږدې ۵۴۰۰ ټنه جلغوزي صادر شوي دي.
د صنعت او سوداګرۍ وزارت مسوولین وايي، چې په روان کال کې د هېواد د جلغوزیو په صادراتو کې د پام وړ زیاتوالی راغلی دی.
د صنعت او سوداګرۍ وزارت ویاند آخوندزاده عبدالسلام ويلي، چې له افغانستان څخه په تېرو نهه میاشو کې چین، پاکستان، عربستان، عربي متحده امارتو، سعودي، هندوستان، ایتالیا، امریکا، کانادا، انګلیستان، آسټرالیا، ترکیې، سویدن، اوکراین او بلجیم ته شاوخوا ۵۳۸۰ ټنه جلغوزي صادري شوي، چې مالي ارزښت يي ۵۳ میلیونه دالرو ته رسیږي.
د صنعت او سوداګرۍ وزارت ویاند عبدالسلام آخوندزاده وایي: زمونږ د جلغوزیو په صادراتو کې د پام وړ زیاتوالی راغلی. مونږ هڅه کوو، چې د جلغوزیو په ګډون د هېواد ټولو کرنیزو محصولاتو د صادراتو بهیر نور هم پراخه کړو.
د هېواد د خصوصي سکتورغړي که څه هم د جلغوزیو د صادراتو پر زیاتوالي خوښي څرګندوي او زیاتوي، چې په روان کال کې د هېواد د جلغوزیو حاصلات څه باندې د ېرش زره متریک ټن ته رسیدلي.
د اقتصادي چارو کارپوهان هم د صنعت او سوداګرۍ له وزارته غوښتنه کوي، چې د کورنیو کرنیزو محصولاتو لپاره د بازار موندنې په برخه کې زیاته همکاري وکړي.
دوۍ وايي، پر جلغوزیو سربېره د هېواد زعفران، انځر، پستې لپاره هم باید د سیمې او نړۍ په مارکیتونو کې بازار موندنه تر سره شي.
