د افغانستان اسلامي امارت د ریاست الوزرا عالي مقام دفتر عمومي رئیس محترم ډاکتر ملا عبدالواسع د اهل تشیع يو شمېر مشرانو سره ارګ کې وکتل.
په دې کتنه کې، لومړی د ریاست الوزرا عالي مقام دفتر عمومي ریاست د سیاسي او ولسي چارو رئیس مولوي ګلزار احمد حقاني دېته په اشارې چې د ارګ دروازې د ټولو هیوادوالو پر مخ پرانېستې دي وویل، دا زموږ مسوولیت دی چې د خلکو ستونزې واورو او ورته د حللارو موندلو هڅه وکړو.
وروسته مولوي حافظ ذاکرالله د هغوی په استازيتوب د اهل تشيع د ستونزو حل کمېسيون جوړېدو او د هغه اهمیت په اړه معلومات ورکړل وې ويل، کمېسیون د اهل تشیع هیوادوالو یو شمېر ستونزې حل کړي او اهل تشيع اسلامي امارت سره هر ډول همکاریو ته چمتو دي.
ورپسې الحاج سید محمد حسن شریفي بلخابي د اهل تشیع د ستونزو په اړه خبرې وکړې وې ویل، موږ د اسلامي امارت او اهل تشیع ترمنځ ارتباطي پُل یوو.
په دې کتنه کې د اهل تشيع مشرانو په استازيتوب محمد علي اخلاقي خبرې وکړې او د امنیت تامین، د پردیو فرهنګ لمنځه تللو او د هیواد د اقتصادي ودې لپاره پر روانو هڅو يې خوښي وښوده.
د ریاست الوزرا عالي مقام دفتر عمومي رئیس محترم ډاکتر ملا عبدالواسع د هغوی د خبرو تر اورېدو وروسته وویل، په تېرو شلو کلونو کې د افغانستان ټولو خلکو د اسلامي نظام ټینګښت لپاره قرباني ورکړې ده.
نوموړي زیاته کړه: موږ هڅه کوو قومي، ژبنیو او سمتي مسایلو ته له پام پرته ټولو خلکو ته یو برابر خدمتونه وړاندې کړو.
محترم ډاکتر ملا عبدالواسع څرګنده کړه، د هیواد ابادي او پرمختګ د ټولو افغانانو مسوولیت دی او اسلامي امارت هڅه کوي، ترڅو کار اهل کار ته وسپاري.
د ریاست الوزرا عالي مقام دفتر عمومي رئیس د خپلو خبرو پای کې وویل، د اهل تشیع ستونزې به د حل په موخه اړوندو ادارو سره شریکې شي.
