د تشکيلاتو او معاشونو تنظيم کمېسيون غونډه پرون د افغانستان اسلامي امارت د رياست الوزرا اداري مرستيال محترم مولوي عبدالسلام حنفي په مشرۍ د عالیقدر امیرالمؤمنین شيخ القران و الحديث مولوي هبت الله اخندزاده حفظه الله په لارښوونه ترسره شوه.
دغه غونډه د پخوانيو غونډو په دوام (دريمه غونډه) د تشکيلاتو او معاشونو تنظيم محترم کمېسيون غړو او د افغانستان اسلامي امارت د مشرتابه مقام دفتر استازي محترم مولوي احمد جان بلال په حضور کې د اقتصاد وزارت سرپرست محترم قاري صاحب دين محمد حنيف او د محترم اقتصادي کمېسيون استازي، د ترانسپورټ او هوايي چلند وزارت سرپرست محترم ملا حميدالله اخندزاده، د صنعت او سوداګرۍ وزارت سرپرست محترم حاجي نورالدین عزيزي، د کابل محترم ښاروال مولوي صاحب عبدالرشيد، د ماليې وزارت د ګمرکونو معین محترم حاجي ملا ناصر اخند او د ياد وزارت تخنيکي او مسلکي متخصيصينو سره، د فوايد عامې وزارت تخنيکي مرستيال محترم مولوي صاحب عبدالکریم فاتح، د سوداګرۍ او پانګونې خونې استازي محترم محمد يونس مومند، د صنايعو او کانونو خونې رئيس شېرباز کمين زاده، د کسبګرو خونې سرپرست شيرين اغا سخي، د تازه ميوو اتحاديې رئيس حاجي اختر محمد احمدي د تېلو او ګازو دولتي شرکت رئيس محترم انجينر محمد نصير رحيمي او د صرافانو، زرګرانو او تېل پلورونکو اتحاديې استازي په ګډون ترسره شوه.
په غونډه کې د ټاکل شوې تخصصي کمېټې پر راپور؛ پر زرګرانو، صرافانو، پوهنتونونو او خصوصي ښوونځيو، ميوه پلورونکو، قالين پلورونکو او تېل پلورونکو (د تېلو ټانګونه)، جوازونو اخيستو پروسه کې د اسانتياوو رامنځته کولو، د سوداګرو، صنعتکارانو او کسبګرو هڅونې او ورته د ځانګړې پاملرنې په اړه هر اړخيز بحث وشو او په پای کې د کمېسيون له لوري د يادو مواردو په اړه لازم تصميمونه ونيول شول.#
