د افغانستان اسلامي امارت د ریاست الوزارء اداري مرستیال محترم مولوي عبدالسلام حنفي په کابل کې د صنعت اوونۍ او د بین المللي نندارتون په اختتامیه مراسمو کې وویل، د افغانستان اسلامي امارت په ټول توان سره په هیواد کې د صنعت، سوداګرۍ او پانګونې هرکلی او ملاتړ کوي.
د رئیس الوزراء اداري مرستیال مالياتي معافیت ته په اشارې چې په دې وروستیو کې د اسلامي امارت د رهبرۍ له لورې د خصوصي ښوونځیو او پوهنتونونو او صنعت او سوداګرۍ لپاره اعلان شوی وویل، اوسمهال په افغانستان کې د سوداګرۍ او پانګونې لپاره هر ډول زمینه برابره شوې ده، له ټولو ملي سوداګرو او پانګوالو څخه چې له هیواده بهر ژوند کوي او همدا راز له هغو هیوادونو چې مخکې یې په افغانستان کې پر جنګ پانګونه کوله غواړو، چې د نشه یي توکو د لمنځه وړلو او ځوانانو د مهاجرت د مخنیوي په موخه باید له صنعت او انکشافي پروژو ملاتړ وکړي.
محترم مولوي حنفي همداراز له دوی وغوښتل، چې هیواد کې دننه په بېلابېلو برخو کې پانګونه وکړي.
د رئیس الوزراء اداري مرستیال په خپلو خبرو کې د سوداګریزو توکو تولید او د وارداتي اقلامو کیفیت ته په اشارې وویل، پانګوال او سوداګر دا اسلامي او اخلاقي مسئولیت لري چې د سوداګریزو توکو د تولید او وارداتي اقلامو کیفیت ته ځانګړې پاملرنه وکړي.
محترم مولوي عبدالسلام حنفي د خپلو خبرو په پای کې وویل: له هغو شرکتونو او سوداګرو سره به چې خدای ناخواسته بې کیفیته توکي تولید یا راواردوي؛ جدي چلند وشي.
