د افغانستان اسلامي امارت د رياست الوزرا اداري مرستيال محترم مولوي عبدالسلام حنفي د کابل محترم والي شيخ محمد قاسم خالد سره وکتل.
په پيل کې، محترم شيخ محمد قاسم خالد د خپلو فعاليتونو او د کابل ولايت د ملکي او نظامي ارګانونو د کړنو په اړه د رياست الوزرا اداري معاونیت ته معلومات ورکړل.
د کابل والي زياته کړه، د بېساره هڅو په پايله کې امنيتي ځواکونه توانېدلي د پلازمېنې اوسېدونکو ته امنيت او ارامي رامنځته او د کابل ولايت ښار او ولسواليو کې بشپړ امنيت تامين کړي.
محترم شيخ محمد قاسم خالد همداراز وويل، د محرم مراسم د دې مياشتې په لومړۍ او دويمه ورځ د کابل ښار په جوماتونو او تکيه خانو کې د اهل تشيع وروڼو له لوري په بشپړه ارامۍ کې ترسره شوي او امنيتي ځواکونه تياری لري چې په پاتې ورځو کې هم د محرم مراسمو امنيت د شته امکاناتو په چوکاټ کې په تر ټولو غوره ډول تامين کړي.
په مقابل کې، د افغانستان اسلامي امارت د رياست الوزرا اداري مرستيال محترم مولوي عبدالسلام حنفي د کابل محترم والي ته د ښه راغلاست ترڅنګ د کابل ولايت خلکو ته په غوره ډول د خدمتونو رسولو لپاره د نوموړي فعاليتونه وستايل.
د رياست الوزرا اداري مرستيال په کابل ښار او همداراز ولسوالیو کې شته امنيت بېساری وباله او په امنيتي ارګانونو کې يې د مجاهدينو قربانۍ وستايلې.
محترم مولوي عبدالسلام حنفي د خپلو خبرو په بله برخه کې د محرم مراسمو د امنیت پر تامين ټينګار وکړ او زياته يې کړه، د اسلامي امارت مجاهدین به د جوماتونو او تکيه خانو د امنيت تامين لپاره خپلې ټولې هڅې وکړي.
