د ریاست الوزراء سیاسي مرستیال د افغانستان لپاره د پاکستان ځانګړي استازي سره وکتل

د افغانستان اسلامي امارت د ریاست الوزراء سیاسي مرستیال محترم مولوي عبدالکبیر په سپېدار ماڼۍ کې د افغانستان لپاره د پاکستان ځانګړي استازي اصف دراني سره وکتل.
په دې ناسته کې، چې په کابل کې د پاکستان سفیر عبدالرحمن نظامياني هم حضور درلود، د ریاست الوزراء محترم سیاسي مرستیال نوموړي ته د ښه راغلاست ترڅنګ وویل، د افغانستان اسلامي امارت له پاکستان سره د سیاسي، اقتصادي او فرهنګي اړیکو لا ډېرښت او قوت غواړي او باوري دی، چې پاکستان او افغانستان پخپلمنځي سوداګرۍ کې تر نورو ډېره ګټه کولی شي.
نوموړي زياته کړه، موږ له پاکستان څخه غواړو چې د سوداګرۍ پراختیا لپاره افغان سوداګرو ته وېزې او نورې اسانتیاوې برابرې کړي، ترڅو دوه اړخيزه سوداګري نوره هم وغوړېږي.
محترم مولوي عبدالکبیر وویل، زموږ ډېر شمېر هیوادوال پاکستان کې د مهاجرت شپې او ورځې تېروي او د دوی د کوربه توب له امله پاکستان څخه مننه کوو، خو ځينې وخت په دې اړه دردونکي خبرونه اورېدل کېږي او له پاکستان څخه مو غوښتنه دا ده چې له دوی سره ښه چلند وکړي. همداراز هغه افغان کډوال چې دا مهال د پاکستان زندانونو کې پراته دي، بايد ژر تر ژره خوشې شي.
د ریاست الوزراء سیاسي مرستیال زیاته کړه، افغانستان د پاکستان په ګډون د هېڅ هيواد په کورنيو چارو کې لاسوهنه نه کوي او هيچاته به اجازه ور نه کړو چې د افغانستان خاوره د ګاونډيو په ګډون د چا پر ضد وکاروي.
محترم مولوي عبدالکبیر زياته کړه، موږ د پاکستان امنیت د ځان په ګټه او په پاکستان کې ناامني د ځان په زیان بولو او د یوه مسلمان ګاونډي په توګه په پاکستان کې جګړه او ناامني نه غواړو، نو هیچاته اجازه نه ورکوو چې زموږ خاوره د پاکستان پر ضد وکاروي.
په پای کې د رياست الوزرا سياسي مرستيال وويل، موږ د داسې هیواد په توګه چې د جګړو ترخې تجربې مو لیدلي پاکستان ته مشوره ورکوو، چې د جګړو پر ځای سولې ته ترجیح ورکړي.
ور پسې د افغانستان لپاره د پاکستان ځانګړي استازي ښاغلي اصف درانی وویل، نړۍ باید د افغانستان اسلامي امارت لاسته راوړنې او په ځانګړې توګه د امنيت تامين او مخدره توکو لمنځه وړو په برخو کې ومني.
هغه وویل، موږ له افغانستان سره نیکې اړیکې لرو او د دې اړیکو د لا تقویې لپاره هڅې کوو.
نوموړي ژمنه وکړه، چې په پاکستان کې د مېشتو افغان کډوالو ستونزې هواروي او د دوی په زندانونو کې د افغان بندیانو خوشې کولو، افغان سوداګرو ته د ویزو او نورو اسانتیاوو برابرولو، په تورخم او سپین بولدک د تګ راتګ پر مهال د خنډونو لمنځه وړلو او نورو برخو کې به عاجل اقدامات وکړي.
نوموړي همداراز وويل، پاکستان به ډېر ژر د تورخم ـ جلال اباد سړک پاتې کارونه پيل کړي.