د المپیک ملي کمېټې او سپورټ عمومي ریاست مسئولینو، د حکومت د اطلاعاتو او رسنیو په مرکز کې ملت ته د دولت حساب ورکولو پروګرام کې د یوه مطبوعاتي کنفرانس پر مهال، د یاد ریاست د یو کلنو کړنو او لاسته راوړنو په اړه معلومات وړاندې کړل.
د المپیک ملي کمېټې او سپورټ عمومي ریاست مسئولینو په دې خبري کنفرانس کې وویل: د تېر کال پر مهال د هېواد په کچه د بېلابېلو سپورټي څانګو ۳۵۸۶ تشويقي، مناسبتي او رسمي سيالۍ تر سره شوي د ي. دغه راز د هېواد د مختلفو سپورټي څانګو ورزشکارانو په ۴۹ بهرنيو سياليو کې ګډون کړی، چې ۲ د طلا، ۱۰ د نقرې او ۱۰ د برونزو مډالونه یې ګټلي دي.
د المپیک ملي کمېټې او سپورټ عمومي ریاست مسئولینو زیاته کړه، د پلازمنې کابل د سپورټي برنامو د ښه تنظیم او پرمختګ لپاره، د عمومي ریاست په اډانه کې د سپورټ ریاست او دوه نوي آمریتونه رامنځته شوي، د لویو ورزشي مسایلو د حل لپاره د ورزش عالي شوری تشکيل شوې، د مالي امکاناتو د جذب او بهرنيو اړيکو پياوړتيا لپاره، د مالي چارو او بهرينو اړيکو کمېسيون جوړ شوی او دوه ځلې د المپيک له نړيوالې کمېټې او اسيايي کمېټې سره انلاین ناستې ترسره شوې دي.
د المپیک ملي کمېټې او سپورټ عمومي ریاست مسئولینو په وینا، په معیاري ډول د اوزلوبې، فوټبال، واليبال او فوټسال ليګونو تر سره کېدل، د ډېرو فدراسيونونو د بهرنیو اړيکو ښه کېدل او په دې برخه کې د ستونزو حلېدل او د ۴۲ فدراسيونونو ملي انتخابي سیالیو په لار اچول؛ په تېر کال کې د دغه ریاست له نورو لاسته راوړنو څخه دي.
دغه راز په ودانیزه برخه کې د پنځو پروژو پلي کول، د ستراتېژیک پلان نهایي کول، د دوه اړخيزه تفاهم لیکونو لاسلیکول او ظرفیت لوړونه؛ په ۱۴۰۲ کال کې د المپیک ملي کمېټې او سپورټ عمومي ریاست له عمده پلانونو څخه دي.
تېر کال کې ۳۵۸۶ داخلي او ۴۹ بهرنۍ سیالۍ تر سره شوي دي
