د افغانستان اسلامي امارت د رياست الوزرا اداري مرستيال محترم مولوي عبدالسلام حنفي نن ماسپښين د اوزبیکستان د لومړي وزير مرستيال محترم جمشېد خواجه يف سره، په داسې حال کې چې د هيواد يو شمېر سوداګرو او پانګه والو يې هم ملتيا کوله، وکتل.
په دې کتنه کې، د اوزبیکستان د لومړي وزير مرستيال محترم جمشېد خواجه يف د رياست الوزرا اداري مرستيال له مېلمستيا څخه د مننې ترڅنګ له افغانستان سره د خپل هيواد د ديني، فرهنګي او تاریخي اړيکو يادونه وکړه وې ويل، د دغو دواړو هيوادونو اړيکې اوسمهال هم په ښه او په متقابل احترام ولاړ حالت کې دي او د اوزبیکستان دولت او ملت په مختلفو برخو کې اسلامي امارت سره د اړيکو لا زياتې پراختيا او استحکام غوښتونکي دي.
د اوزبیکستان د لومړي وزير مرستيال زياته کړه، د دې هيواد دولت، سوداګر او پانګه وال لېوالتيا لري چې د کانونو د استخراج، کرنې، او د انرژۍ تولید په برخو کې په افغانستان کې پانګونه وکړي.
د رياست الوزرا اداري مرستيال محترم مولوي عبدالسلام حنفي د اوزبیکستان د لومړي وزير مرستيال محترم جمشېد خواجه يف او ورسره پلاوي سره په کتنې د خوښۍ څرګندولو ترڅنګ له افغانستان سره د اوزبیکستان د دولت او ملت ترمنځ اړيکې وستايلې وې ويل، د افغانستان او اوزبیکستان ترمنځ اړيکې تاريخي مخينه لري او دغه مناسبات تل د متقابل احترام پر اصل ولاړې دي.
د رياست الوزرا اداري مرستيال زياته کړه، اسلامي امارت په افغانستان کې هر ډول پانګونې او سوداګري ته زمینه برابره کړې ده او له اوزبیکستاني سوداګرو او پانګه والو څخه يې په افغانستان کې د پانګونې غوښتنه وکړه.
د رياست الوزرا اداري مرستيال د اوزبیکستان د لومړي وزير مرستيال او ورسره پلاوي سره وکتل
