د افغانستان اسلامي امارت د ریاست الوزراء سیاسي مرستیال محترم مولوي عبدالکبیر له بهر مېشتي افغان لیکوال، ژورنالېست او سیاستوال زرغون شاه شینواري سره ولیدل.
په دې لیدنه کې، ښاغلي شینواري افغانستان ته د خپل سفر په اړه معلومات ورکړل وې ويل، د اسلامي امارت په راتګ سره په هیواد کې د امن ټغر خپور شوی او د غصب، فساد، زورواکۍ او ناانډولۍ لمن ټوله شوې ده.
هغه وویل، دوی په بهر کې د یو شمېر نورو مېشتو افغان متخصصینو، لیکوالانو او پوهانو په ملتیا هڅه کوي له اسلامي امارت سره د بهر مېشتو افغانانو او هیوادونو د تعامل، اړیکو او همکاریو لپاره زمینه برابره کړي.
نوموړي زیاته کړه، د افغانستان عیني شرائط او واقعیتونه له هغو سره ډېر توپیر لري چې په بهرنیو هیوادونو کې یې خلک له ټولنیزو شبکو او رسنیو څخه اوري.
د ریاست الوزراء سیاسي مرستیال محترم مولوي عبدالکبیر ښاغلي زرغون شاه شینواري او د هغه ملګرو ته د ښه راغلاست ترڅنګ وويل، اسلامي امارت د ټولو افغانانو په ځانګړي ډول د پوهانو، لیکوالانو او متخصصینو د نظرونو او وړاندیزونو هرکلی کوي.
هغه وویل، په افغانستان کې په تېرو دوو کلونو پام وړ بنسټیز کارونه او پرمختګونه شوي او د اقتصادي پیاوړتیا او رفاه لپاره هم کار روان دي.
محترم مولوي عبدالکبیر د خپلو خبرو پای کې زياته کړه، اسلامي امارت له نړۍ سره مثبت تعامل غواړي او په تېرو څه باندې دوو کلونو کې یې په خپلو ټولو ژمنو عمل کړی دی.
اسلامي امارت د لیکوالانو او متخصصینو د نظرونو او وړاندیزونو هرکلی کوي
