د افغانستان اسلامي امارت د ریاست الوزرا سیاسي مرستیال محترم مولوي عبدالکبیر د اهل تشیع هېوادوالو له څو تنو مخورو او مطرحو څېرو سره ولیدل.
په دې ناسته کې د قومونو او اسلامي امارت پر نږدیوالي د بحث او ټینګار تر څنګ یادونه وشوه چې په هېواد کې د قوم او مذهب په نامه دسیسې ناکامه شوې دي.
استادمحمد اکبري او دتېرې ادارې د کډوالو او راستنېدونکوچارو وزیرسیدمحمدعالمي بلخی د نورو په استازولۍ د خبرو پرمهال وویل، اهل تشیع علمأ د اسلامي امارت د واکمنۍ ملاتړي دي او په عادي ډول خپلې چارې پر مخ وړي.
هغوی زیاته کړه، له حکومتي مشرانو او مسؤلینو سره د دوامداره لیدنو په پایله کې د بحث وړ ډېر مسایل حل او لارې چارې ورته لټول شوې د. همدارنګه یې د اهل تشیع علماوو یو لړ وړاندېزونه په لیکلې بڼه د ریاست الوزراء د سیاسي معاونیت له مقام سره شریک کړل.
د ریاست الوزراء سیاسي مرستیال محترم مولوي عبدالکبیر د قومونو او اسلامي امارت پر نږدې اړیکو خوښي څرګنده او زیاته کړه، هغه حقونه چې په اسلام کې ځای لري اسلامي امارت د هغود ورکړې مسؤول دی.
نوموړي وویل، په اسلامي امارت کې قومي، ژبني او مذهبي مسایل ځای نه لري او نه هم چاته اجازه ورکوي چې دې مسائلو ته لمن ووهي.
د ریاست الوزرا محترم سیاسي مرستیال د اهل تشیع علماوو او مخورو له دوامداره همکاریو په مننې وویل، پر وړاندېزونو به یې غور وشي او په هکله به يې مناسبې پریکړې ترسره شي.
له څو تنه اهل تشیع مخورو سره د ریاست الوزرا سیاسي مرستیال کتنه
