د زندانونو چارو د سمون ادارې مسئولینو، د یکشنبې په ورځ (۱۱ وږی ۱۴۰۳) د حکومت د اطلاعاتو او رسنیو مرکز کې د امارتي ادارو د یو کلنو لاسته راوړنو د تشرېح پروګرام کې د یوه خبري کنفرانس پر مهال، د دغې ادارې د یوکلنو کړنو او لاسته راوړنو راپور له رسنیو سره، شریک کړ.
د زندانونو چارو د سمون ادارې مسئولینو په یاد کنفرانس کې وویل: په تېر کال کې د عالیقدر اميرالمؤمنين (حفظه الله) د فرمان له مخې د روژې مبارکې مياشتې، کوچني او لوی اختر په مناسبت، ۳۲۰۰ بنديان ازاد شوي او د ۱۶۵۵ نورو په مجازاتو کې تخفیف رامنځته شوی دي.
مسئولینو زیاته کړه، چې د محکمو د مکتوبونو له مخې، ۳۲۴۳ بندیان خوشې شوي، ۳۰۱۶ بندیان له ولایتونو څخه مرکز ته، له مرکز څخه ولایتونو او له یوه ولایت څخه بل ولایت ته لېږدول شوي او د ۱۵۶۲ بندیانو د برخلیک معلومولو لپاره، له سترې محکمې سره اړینه همغږي شوې ده.
په همدې ډول، ۲۲۴۱ بنديان د ديني زده کړو له بېلابېلو برخو څخه فارغ شوي او ٦۴٠٨ تنه نور په ديني زده کړو بوخت دي. همدارنګه، ۱۹۵۴ تنه د سواد زده کړې له برخې فارغ شوي او اوسمهال ۲۳۵۰ تنه نور په زده کړو بوخت دي.
د ادارې مسئولین وایي، چې ۱۱۲۲ بندیان په حرفوي زده کړو بوخت دي او په تېر کال کې ۳۳۷ تنو په بېلابېلو څانګو کې حرفوي زده کړې بشپړې کړي دي.
مسئولینو د خپلو خبرو په دوام وویل: په وروستي یوه کال کې د ادارې د ۱۴۰۳ کال تفصیلي پلان، پالېسي او ستراتېژیک پلان نهایي شوي او د مالي ملاتړ، د بندیانو درملنې، اعاشې، حرفوي زده کړو او د بېلابېلو څانګو د تجهیز په موخه، له یو شمېر بنسټونو سره، د همکارۍ تفاهم لیکونه هم لاسلیک شوي دي.
د مسئولینو په وینا، د زندانونو پولیسو د مسلکي کولو او ظرفيت لوړونې په موخه، ۶۸۰ افسرانو، ساتنمنانو او سربازانو ته روزنيز ورکشاپونه او سيمينارونه جوړ شوي او اوسمهال ۱۶۰ تنه نور په مسلکي زده کړو بوخت دي.
د مسئولینو د معلومات له مخې، د ادارې اړوند ۵۰ بستریز روغتون کې د معالجوي، وقایوي او حمایوي آمریتونو فعالول او د ۴۱۸۸۵۷ بندیانو او پرسونل درملنه؛ په تېر یوه کال کې د دې ادارې له مهمو فعالیتونو څخه دي.
