د کابل ښاروالۍ مسئولینو، د پنجشنبې په ورځ (۲۲ وږی ۱۴۰۳) د حکومت د اطلاعاتو او رسنیو مرکز کې د امارتي ادارو د یو کلنو لاسته راوړنو د تشریح پروګرام کې د یوه خبري کنفرانس پر مهال، د خپلو یوکلنو کړنو او لاسته راوړنو راپور له رسنیو سره، شریک کړ.
د کابل ښاروالۍ مسئولینو په دې خبري کنفرانس کې وویل: په تېر کال کې په ټولیز ډول ۱۲۵.۸۷ کیلومتره عمومي او فرعي سړکونه، سفالټ، کانکرېټ او په تېږو فرش شوي دي. د ۷۳۸۵۲ مربع متر په مساحت سړکونه د سفالټ په شکل ترمیم او د ۳۸۸۷۲ مربع متر په مساحت د نورو سړکونه داغګیري شوې ده.
مسئولینو زیاته کړه، د ٢٥٠٠ مترو په اوږدوالي د کانال ساختمان او جبارخان سړک، د ۲۷۳ مترو په اوږدوالي د څرخي پله د تلاشي سيمې د کانال ساختمان، د ۵۱۱ مترو په اوږدوالي د خيرخانې درېيمې برخې د کانال ساختمان او د ۱۲۹۷ مترو په اوږدوالي د امنیت ښارګوټي د کانال ساختمان د لوېدیځې برخې چارې بشپړې شوي او د ۲۱۹۴ مترو په اوږدوالي د هوايي ډګر له څلورلارې څخه تر ګمرک پورې د کانال ساختمان جوړولو د چارو دوام؛ په تېر یوه کال کې د کابل ښاروالۍ له فعالیتونو څخه دي.
په همدې ډول، اتلسمه ناحیه کې د تعمیر ساختمان او د برېښنا برج، د ۱۷مې ناحیې د احاطې ساختمان او د کابل ښاروالۍ مربوطاتو کې د تیلو پمپ سټیشن ساختمان جوړول، همدارنګه په اتمه ناحیه کې د ښځو مارکیټ د ساختمان، له قصبې نه تر پنجصد فامیلیو پورې د زېرزمیني دکانونو ساختمان او د کابل ښاروالۍ مربوطاتو کې د ګرین هاوس او ګدامونو د ساختمان جوړولو چارو بشپړېدل، دغه راز د کابل ښار بېلابېلو ناحیو کې د څاګانو کیندل؛ د تېر کال پر مهال د کابل ښاروالۍ نور فعالیتونه دي.
د مسئولینو په وینا، د اتمې او دولسمې ناحیې د ساختمانونو، د سنګ نوشتې فابریکې د تاسیساتو او د تره خیلو فابریکې د مسجد او تاسیساتو ترمیم، په تېر کال کې د کابل ښاروالۍ د کړنو یوه برخه ده. همدارنګه د سړک غاړو د ۵ زره څراغونو نصب او فعالول، د کابل ښار بېلابېلو ناحیو کې د ۹۷۰۰ تنویر پایو ترمیم، د ۶ څلورلارو ښکلي کول، د ښار په ۲۲ ناحیو کې د ادرس موندلو لوحو لګول، د عمومي او فرعي جادو رنګول او د کابل ښار له بېلابېلو برخو څخه د ۲۰۶۸ موانعو راټولول؛ په تېر کال کې د کابل ښاروالۍ له نورو اجرااتو څخه دي.
په تېر کال کې د UNOPS په همکارۍ، د کوڅو او کانالونو د احداث او کانکرېټ اچولو او پارکونو د شنه کولو، ۲۰۰ پروژې تر پلان لاندې وې. همدارنګه د کابل ښار له ۲۲ ناحیو څخه ۵۲۶۰۸۰ ټنه کثافات د نظر وړ سیمو ته لېږدول شوي او د ۵۷۵۶۵ مترو په اوږدوالي عمومي کانالونه او ۴۰۵۰۴۴ متره د سړک غاړې ویالې هم پاکې شوي دي.
مسئولینو د خپلو خبرو په دوام وویل: په تېر یوه کال کې په ټولیز ډول د نباتي بوټو ۲ میلیونه ډوله تولید، تکثیر او کېښودل شوي، شته پارکونه او نوي جوړ شوي پارکونه شنه شوي او په څرخي پله کې د مرنجان تپې، رحمان مېنې، کازینو او د قبال جومات شمال کې د پارکونو پر جوړولو کار روان دی.
مسئولین زیاتوي، چې له لاس پلورونکو او کراچیو څخه د کابل ښار د بېلابېلو ناحیو د مزدحمو ساحو پاکول، د سرغړونو له امله د ۲۶۲۶ اصنافو فعالیت په موقتي توګه ځنډول، د ۱۰۵۷ بې جوازه اصنافو پېژندنه، د کابل ښار په ۲۲ ناحیو کې ۱۱۹۵۷ اصنافو ته د جوازونو ورکړه، د ١٠٢ مارکېټونو او ۱۱ پمپ سټېشنونو ثبتول او د ژمي په موسم کې کابل ښاريانو ته د ډبرو سکرو وېش؛ د کابل ښاروالۍ له لاسته راوړنو څخه دي.
د مسئولینو په خبره، د فلټرونو نشتون له امله د ۶۲۵ لوړ پوړیزه ودانیو بندول، د ۲۰۵۵۷۷ کیلو ګرامه تاریخ تېرو خوراکي او بې کیفیته مینځونکو توکو راټولول، د کابل سیند ته د ۸۲۵ لوړ پوړیزه ودانیو او استوګنې کورونو د فاضله اوبو د جریان بندول او اصنافو ته د ۸۸۷۲ صحي کارتونو وېش؛ د چاپېریال ساتنې برخه کې د کابل ښاروالۍ فعالیتونه دي.
د مسئولینو د معلوماتو له مخې، د تفصیلي پلانونو طرحه، د سوداګریزو او استوګنیزو ساحو لپاره پیشنهادي طرحې، ساختمانونو ته د ۲۴۸ جوازونو او ۲۲ نقشو ورکړه او د ۵۵۳ نورو نقشو ویزه کول او د کابل ښار په ۲۲ ناحیو کې د ۳۰۹۵ ودانیو له سرغړونو مخنیوی؛ په تېر کال کې د کابل ښاروالۍ عمده لاسته راوړنې دي.
