د امارتي شرکتونو لوی ریاست او د مالیې او ترانسپورټ وزارتونو مسئولینو، د چهارشنبې په ورځ (۱۸ تله ۱۴۰۳) د حکومت د اطلاعاتو او رسنیو په مرکز کې د یوې خبري ناستې پر مهال په باروړونکو موټرو کې د جي پي اېس لاکر لګولو تړون لاسلیک کړ.
د امارتي شرکتونو لوی ریاست مسئولینو په یاده ناسته کې وویل: د دغه تړون له مخې د خوندي او ډاډمن ترانزيټ او د پانګوالو د جذب او هغوی ته د لا زیاتو اسانتیاوو برابرولو په موخه، په باروړونکو موټرو کې ځیرک قلفونه (جي پي اېس لاکر) لګول کېږي.
مسئولینو زیاته کړه، افغان پُست امارتي شرکت د ټرانسپورټ او هوایي چلند او مالیې وزارتونو په همکارۍ، د دغې ملي او بنسټیزې پروژې پلي کېدو ته لار پرانیسته او په نېږدې راتلونکي کې به یې عملي چارې پیل شي.
مسئولینو د خپلو خبرو په دوام وویل، ځیرک قلفونه (جي پي اېس لاکر) هغه الکترونیکي قلفونه دي چې د نړیوال موقعیت پیدا کولو سیستم (جي پي اېس) څخه په استفادې، په باروړونکو لاریو کې لګول کېږي او د سوداګریزو توکو د خوندیتوب، لګښتونو د کمېدو او ترانزیټ د ودې لامل ګرځي.
د مسئولینو په وینا، ځیرک قلفونه سوداګرو سره مرسته کوي چې د خپلو سوداګریزو توکو د دقیق موقعیت په اړه معلومات ترلاسه کړي. همدارنګه له ټاکل شوي مسیر څخه د نقلیه وسیلې د انحراف په صورت کې دغه سیستم د نقلیه وسیلې نوی موقعیت په ډاګه کوي او د سوداګریزو توکو له سرقت څخه مخنیوی کوي.
همدارنګه مسئولینو په دې ناسته کې د پُستي کود او پتې د پراختیا ملي برنامې پرانیسته وکړه او د هېواد په کچه د پُستي خدمتونو لپاره، د نوي شپږ رقمي پُستي کود د پلي کېدو په اړه یې معلومات ورکړل وې ویل: افغانستان تر دې مهاله له څلور رقمي پُستي کود څخه ګټه پورته کوله چې له نننۍ ټکنالوژۍ سره سم د معیاري خدمتونو وړاندې کولو جوګه نه وو او پرېکړه وشوه څو داسې کود چمتو شي چې اوسنۍ ټکنالوژۍ سره سم د معیاري خدمتونو وړاندې کولو جوګه وي.
مسئولینو زیاته کړه، افغان پُست امارتي شرکت د هېواد په کچه نوی شپږ رقمي کود جوړ کړ او د نړیوالې پُستي اتحادیې لخوا تایید شو، چې له دې وروسته به په ملي او نړیوالو پُستي خدمتونو کې ګټه ور څخه پورته شي.
د مسئولینو د معلوماتو له مخې د هېواد په کچه ۱۴۰۵ پُستي کودونه په پام کې نیول شوي، چې د هېواد ټولې سیمې تر پوښښ لاندې نیسي.
