د افغانستان اسلامي امارت د ریاست الوزراء اقتصادي مرستیال محترم ملا عبدالغني برادر اخوند د پاکستان د دفاع وزیر ښاغلي خواجه اصف په مشرۍ لوړپوړي پاکستاني پلاوي سره په ارګ کې وکتل.
محترم ملا برادر اخوند سره تر ليدنې وروسته د پاکستاني پلاوي او افغان لوري ترمنځ مفصل کاري مجلس وشو، چې د ملي دفاع وزیر محترم مولوي صاحب محمد یعقوب مجاهد، د کورنیو چارو وزیر محترم خلیفه صاحب سراج الدین حقاني، د بهرنیو چارو وزیر محترم مولوي صاحب امیر خان متقي او د استخباراتو لوی ریاست مشر محترم ملا عبد الحق وثیق پکې ګډون درلود، د دواړو هېوادونو ترمنځ پر ګڼو لېوالتیا وړ مسايلو باندې مفصلې خبرې وشوې.
په ناسته کې، دواړو لوريو پر امنيتي اندېښنو، زموږ پر سيمه د ډرون الوتنو او د مخالفو وسلهوالو په فعاليت واضحې او مفصلې خبرې وکړې.
همداراز د دواړو هېوادونو ترمنځ پر ترانزیټ، تجارتي او اقتصادي اړيکو، د ډيورنډ کرښې په اوږدو کې د تګ راتګ پر ستونزو او پاکستان کې د افغان مهاجرینو پر مشکلاتو ګټور بحثونه وشول. دواړو لوريو وپتېيله چې اقتصادي او سوداګريز مسايل بايد د سياسي ستونزو له امله زيانمن نه شي.
په پای کې دواړو خواوو د خبرو او تفاهم له لارې د مسائلو پر حل او د سیاسي او اقتصادي روابطو پر پراختیا او تقويې ټینګار وکړ.
