د ریاستالوزرا اقتصادي معاونیت وایي، د ملي تدارکاتو کمېسیون د شپږو ولایتونو لپاره د دوه میلیارد او ۴۸۰ میلیون افغانیو په ارزښت بېلابېلې پروې منظورې کړې دي.
د ریاستالوزرا اقتصادي معاونیت لیکلي چې سړکونه، د اوبو زېرمې، مجهزې تحویلخانې، احاطوي دېوالونه، د زرغونې سیمې جوړول او خلکو ته د څښاک اوبو او برېښنا برابرول په یادو پروژو کې شامل دي.
سرچینه لیکي چې دغه پروژې په کابل، هرات، فراه، ننګرهار، کندهار او لغمان ولایتونو کې پلې کېږي.
د سرچینې د معلوماتو له مخې، د یادو پروژو لګښت د افغانستان اسلامي امارت له لوري ورکول کېږي.
