د اداري اصلاحاتو او ملکي خدمتونو اداره وایي، چې په تېرو ۱۱ میاشتو کې یې په بېلابېلو وزارتونو او ادارو کې ۳۰۴ پېچلې او وخت نیونکې پروسې ساده کړي دي.
د یادې ادارې رییس، مولوي عبدالحنان عارف الله، د یکشنبې په ورځ (۲۸ کب) د حکومت د اطلاعاتو او رسنیو په مرکز کې د ساده شوو پروسو د تطبیقي هوکړه لیکونو د لاسلیک په تړاو جوړه شوې خبري ناسته کې د ساده شویو پروسو په اړه معلومات ورکړل وې ویل: دا د اسلامي امارت پالېسي ده، چې عامه ادارې خپل خدمتونه چټک او شفاف کړي څو په دې برخه کې د ولس ستونزې هوارې شي.
ښاغلي عارف الله زیاته کړه، په تېرو یولس میاشتو کې په بېلابېلو وزارتونو او ادارو کې ۳۰۴ پېچلې او وخت نیونکي پروسې لنډې او ساده شوي دي. نوموړي وویل د یادونې وړ ده، چې په تېره اداره کې د ۱۲ کلونو پر مهال د زیاتو لګښتونو په ګاللو سره، یوازې ۱۷۶ پروسې ساده شوې وې.
دغه راز د لوړو زده کړو وزارت سرپرست، شیخ ندا محمد ندیم په دې ناسته کې وینا وکړه وې ویل: مونږ چې د خدمت لپاره ټاکل شوي یو، یوازېنی هدف مو دا ده چې د ولس ستونزې هوارې کړو. ښاغلي ندیم زیاته کړه، له ولس سره مو ژمنه کړې وه چې پېچلې او وخت نیونکي پروسې به لنډوو او په دې برخه کې د اداري اصلاحاتو او ملکي خدمتونو ادارې را سره مرسته وکړه چې له همکارۍ نه یې منندی یو.
دغه راز ښاغلي ندیم وویل، د پېچلو پروسو ساده کول د اداري فساد له منځه وړلو برخه کې هم مرسته کوي او د وزارت اړوندو ریاستونو ته مې لارښوونه داده چې د ساده شویو پروسو طرحې په سمدستي ډول پلې کړي.
د لوړو زده کړو وزارت مرستیال الحاج حافظ مولوي عبدالحسیب حامد وویل: پخوا د ډیپلوم اخیستلو پروسه تر یوې میاشتې پورې یې وخت نیوو اوس د پروسو په ساده کولو سره په ۲ یا ۳ ورځو کې ډیپلوم متقاضي ته ورکول کیږي.
همدارنګه د تخنیکي او مسلکي زده ادارې رییس، مولوي غلام حیدر شهامت وویل: په تېره اداره کې اداري فساد د اصلاحاتو مانع وو؛ خو د اسلامي امارت په راتګ سره، د اداري فساد مخنیوي برخه کې کوټلي ګامونه پورته شول او د اصلاحاتو بهیر چټک شو. ښاغلي شهامت زیاته کړه، مونږ د هر هغه اقدام هر کلی کوو چې د ولس په ګټه وي.
دغه ناسته د اداري اصلاحاتو او ملکي خدمتونو ادارې، لوړو زده کړو وزارت او د تخنیکي او مسلکي زده کړو ادارې د مسوولینو ترمنځ د ساده شوو پروسو د تطبیقي هوکړه لیکونو په لاسلیک سره، پای ته ورسېده.
