د افغانستان اسلامي امارت د ریاست الوزراء مقام د دفتر لوی رئیس محترم ډاکټر ملا عبدالواسع د ختیځ زون کوچي قوم له یو شمېر مشرانو سره په ارګ کې وکتل.
د دغې کتنې په پیل د ریاست الوزراء مقام د دفتر عمومي ریاست د سیاسي او ولسي چارو رئیس مولوي ګلزار احمد حقاني دوی ته د ښه راغلاست پر مهال وویل، کوچي قوم په تېرو شلو کلونو کې د اسلامي امارت د مجاهدینو ترڅنګ د اسلامي نظام د برقرارۍ هڅې کړي دي، موږ مسوولیت لرو د خپل توان په اندازه د دوی ستونزې حل او خدمت یې وکړو.
وروسته مولوي نواب ملاخېل د کوچي قوم د اړتیاؤ او ستونزو په اړه خبرې وکړې وې ویل، کوچیان د افغانستان په ډېری ولایتونو کې ژوند کوي او موږ په شرقي زون کې د کوچیانو لپاره د یوه ښارګوټي د جوړېدو غوښتونکي یوو.
ورپسې انجنیر نجیب الله د نورو په استازیتوب په خپلو خبرو کې وویل، کوچي قوم د اسلامي نظام د برقرارۍ لپاره زیاتې قربانۍ ورکړي او موږ د خپلو حقوقي ستونزو د حل او سرپناه برابرولو برخې ته ځانګړې پاملرنه غواړو.
د ریاست الوزراء مقام د دفتر عمومي رئیس محترم ډاکټر ملا عبدالواسع د دوی د خبرو له اورېدو وروسته وویل، موږ ویاړو چې د افغانستان د بېلابېلو اقوامو ستونزې اورو او د حل لپاره یې د خپل وس او توان مطابق کوښښ کوو.
نوموړي په افغانستان کې د اسلامي نظام د برقرارۍ لپاره د کوچیانو د همکارۍ قدرداني وکړه وې ویل، د تېرو شلو کلونو او تر هغې ور هاخوا پر ستونزو او ورانۍ غلبه په یوه یا دوه کلونو کې امکان نه لري، بناء ټول باید تکلیفونه وګالو او د اسلامي نظام د استحکام او د اسلامي ارزښتونو د تحفظ او ساتنې په خاطر لازیاتې هڅې وکړو.
د ریاست الوزراء مقام د دفتر عمومي رئیس د خپلو خبرو په پای کې وویل، تاسې ته ډاډ درکوم چې د اسلامي امارت مسوولین به ستاسې د ستونزو د حل په موخه خپله نهایي هڅه وکړي او هغه به د ځمکو د غصب د مخنیوي کمېسیون او نورو اړوندو ادارو سره شریکې کړي.
