د سټنډرډ ملي ادارې مسوولینو، نن چهارشنبه (۲۳ وری ۱۴۰۲) د حکومت د اطلاعاتو او رسنیو په مرکز کې د یوه خبري کنفرانس پر مهال، د ۱۴۰۱ مالي کال د کړنو او فعالیتونو راپور له رسنیو سره، شریک کړ.
د سټنډرډ ملي ادارې سرپرست، الحاج ملا فیض الله تمیم وویل: په ۱۴۰۱ هـ ش کال کې د انجنیرۍ، ښاري پراختیا، ودانیزو، سړکونو او پلونو برخه کې د افغاني کلتور په پام کې نیولو او د هېوادونو او سیمه ییزو سازمانونو له معیارونو سره سم، ۷۷۵ سټنډرډونه او ۶ ملي کوډونه چمتو شوي او په بېلابېلو برخو کې د ۵۸ سټنډرډونو پر تدوین هم کار روان دی.
ښاغلي تمیم زیاته کړه، د سټنډرډ ملي اداره اوسمهال د سټنډرډ د نړیوالو سازمانونو لکه (IEC)، (ILAC)، (SMIIC)، (SARSO) او (ISO) غړیتوب لري او د سټنډرډ د نړیوالو سازمانونو په ناستو کې فعاله حضور لري.
د چارواکو په خبره، افغانستان ته د معیاري ګازو واردولو په اړه، له ترکمنستان سره همغږي شوې او د تخنیکي همکاریو جلبولو په موخه له دغه هېواد سره تفاهم لیک هم لاسلیک شوی او له ډیپلوماټیکو لارو د دوه نورو تفاهم لیکونو مسودې هم د ایران او ترکیې هېوادونو ته استول شوي دي.
دغه راز چارواکي زیاتوي، په وروستي یوه کال کې له پمپ سټېشنونو، د پلور له مرکزونو او د نفتي توکو له زېرمو او تصفیه خونو څخه په دوامداره توګه څارنه شوې؛ د بې کیفیته نفتي توکو زېرمې او د تېلو سلګونه ټانکونه تړل شوي دي.
دغه راز، د حیرتانو، اسلام کلا، تورغونډۍ، کندهار، نیمروز، فراه، آقینې، جلال آباد او شیرخان په بندرونو کې د څه باندې زر ټانکره بې کیفیته تېلو د واردولو مخنیوی، د تېلو، اوبلن ګاز او روغنیاتو د ۱۲۳۱ نمونو تاییدي او د نفتي زېرمو مالکینو او سوداګرو ته اړینې سپارښتنې، په وروستي کال کې د دغې ادارې نورې لاسته راوړنې دي.
چارواکي وایي، په هېواد کې د اوسپنې ویلولو، ګول سیخونو او اوسپنیزو الاتو له فابریکو او دغه راز په کابل، بلخ، جوزجان، سرپل، فاریاب، بغلان، کندوز او تخار ولایتونو کې د ګول سیخونو او ودانیزو توکو له ۲۸۴ پلورنځیو او ۳۱ مرکزونو څخه څارنه شوې، د اړینو سپارښتنو تر څنګ د ۳۲۴۱۵ محمولو او د ۷۵ نمونو ګول سیخونو کیفیت تثبیت شوی دی.
د چارواکو په وینا، په وروستي یوه کال کې د امارتي ادارو د غوښتنې له مخې، د ۱۳۴۰ مختلف النوعه وسایلو او وسایطو د مصرف کچه تثبیت شوې ده.
د سټنډرډ ملي ادارې چارواکي له سوداګرو او پانګوالو غواړي، چې هېواد ته د توکو واردولو او تولید برخه کې د سټنډرډ ملي ادارې معیارونه په جدي توګه په پام کې ونیسي.
د معلوماتو پر بنسټ، محصولاتو ته د ارزښت ورکولو او د کیفیت تصدیق پاڼو ورکول، د ملي سټنډرډونو تدوین او تطبیق، د سټنډرډ نړیوالو سازمانونو ناسته کې ګډون، له ایران، ترکیې، سعودي عربستان، اوزبیکستان او پاکستان هېوادونو سره د تفاهم لیکونو تدوین او وروستي کول، د ډبرو سکرو د لابراتوار فعالول، د هېواد په بندرونو کې د لابراتوارونو تجهیزول، د میترولوژي لابراتوار د فعالیت پیلول، د کورنیو محصولاتو لپاره د نندارتونونو تر سره کول او د ظرفیتونو لوړول، په روان کال کې د دغې ادارې له مهمو برنامو څخه دي.
