د افغانستان اسلامي امارت د رياست الوزرا اداري مرستيال محترم مولوي عبدالسلام حنفي د ارشاد، حج او اوقافو وزارت د ۱۴۴۴ ه.ق کال د حاجيانو د لېږد پروسې پيل او لومړني پرواز په مراسمو کې ګډون وکړ.
محترم مولوي عبدالسلام حنفي په دې مراسمو کې وويل، حج د مسلمانانو يوه فريضه او د اسلام رکن دی، چې ترسره کول يې په هر هغه مسلمان چې مالي او فزيکي وړتيا ولري، فرض عين دی.
نوموړي د حج فريضې فضيلت په اړه زياته کړه، د حج مراسمو کې هر رنګ او له هر هيواد څخه د نړۍ ټول مسلمانان د سپين احرام په اغوستو ګډون کوي او ټول په يو ډول د مسلمانانو د يووالي او اتحاد استازولي کوي.
محترم مولوي عبدالسلام حنفي زياته کړه، د امير المؤمنين حفظه الله د لارښوونې او د حج او عمرې ملي کمېټې او ارشاد، حج او اوقافو وزارت د شپه او ورځ هڅو په نتيجه کې د هيواد د حاجيانو د لېږد او ځای پر ځای کولو لپاره غوره اسانتياوې رامنځته شوي او په کور دننه او بهر د هيواد حاجيانو ته د غوره خدمتونو برابرولو په موخه مختلفې کمېټې ګمارل شوې دي.
نوموړي زياته کړه، د تېر کال په پرتله سږکال د حج پروسې لګښت کم دی او د پيسو راټولولو او لېږد په برخو کې هم د حاجيانو له پيسو څخه د خدمت حق نه دی اخيستل شوی، چې دا د حاجيانو لپاره يو ډول مراعات دی.
محترم مولوي حنفي زياته کړه، الحمدالله سږ کال زموږ له هيواد څخه ۳۰ زره حاجيان د حج مراسمو کې ګډون کوي.
نوموړي له حاجيانو وغوښتل، چې د بيت الله شريف د حج ټول مراسم په ښه او غوره طريقه ترسره او د سفر په جريان کې دې حوصله ولري او د افغانستان ځورېدلو او متدينو خلکو او د نړۍ مسلمانانو ته دې دعا وکړي.
نوموړي په پای کې د ارشاد، حج او اوقافو وزارت رهبرۍ او اړوندو ټولو امارتي ادارو څخه مننه وکړه، چې د حج پروسه کې يې له هېڅ ډول هڅو درېغ ونه کړ او د حج مراسمو ترسره کولو جريان کې يې افغان حاجيانو ته د هر ډول اسانتياوو رامنځته کولو لپاره خپلې غوره هڅې کړې دي.
