د افغانستان اسلامي امارت د رياست الوزرا اداري مرستيال محترم مولوي عبدالسلام حنفي د فارياب ولايت د کوهستانات ولسوالۍ يو شمېر مجاهدينو سره وکتل.
په دې کتنه کې، په پيل کې د کوهستانات ولسوال محترم مولوي خان شيرين او د دې ولسوالۍ د کنډک قوماندان مولوي نورمحمد متوکل د نورو په استازيتوب د يادې ولسوالۍ د خلکو د ستونزو او خنډونو په اړه خبرې وکړې.
راغلو مجاهدينو کوهستانات ولسوالۍ د افغانستان يوه صعب العبور سيمه وبلله، چې له امله يې خلک په ځانګړي ډول ناروغان او مېمنې ښار ته د اداري کارونو لپاره مراجعه کوونکي کسان له ډېرو ستونزو سره مخ دي.
هغوی د معياري روغتيايي کلينيکونو، ښوونځيو او ديني مدرسو نشتوالی د خلکو عمده ستونزې وبللې او د اسلامي امارت رهبرۍ څخه يې وغوښتل ترڅو پورتنيو ستونزو په ځانګړي ډول د سړکونو او نښلوونکو لارو ترميم ته ځانګړې پاملرنه وکړي.
د رياست الوزرا اداري مرستيال محترم مولوي عبدالسلام حنفي د کوهستانات مجاهدينو سره په کتنې د خوښۍ ترڅنګ؛ د اشغالګرو ځواکونو اېستلو او بياځلي د اسلامي نظام ټينګښت لپاره د هغوی درېدل او قرباني وستايله.
د رياست الوزرا اداري مرستيال زياته کړه، په ټول افغانستان کې زموږ خلک د ارامه، هوسا او ټولو امکاناتو لرونکي ژوند لايق دي او اسلامي امارت به د خپلو امکاناتو په چوکاټ کې هغوی او په ځانګړي ډول د کوهستانات صعب العبور سيمو په څېر خلکو ته د سړک، ښوونې او روزنې او روغتيا په برخو کې د اسانتياوو رامنځته کولو لپاره کار وکړي.
