د افغانستان اسلامي امارت د ریاست الوزراء اداري مرستیال محترم مولوي عبدالسلام حنفي د ملي دفاع وزارت د توپچي قواؤ له قومندان محترم مولوي یعقوب منصور اکه او د بلخ ولایت له یو شمېر علماؤ او مجاهدینو سره وکتل.
د یادې کتنې په پیل کې محترم مولوي منصور اکه د نورو په استازولۍ د توپچي قواؤ د فعالیتونو او کړنو ترڅنګ د روغتیا او ښوونې او روزنې په برخو کې د بلخ ولایت د ولسونو د وضعیت په اړه هم خبرې وکړې.
هغه زیاته کړه، مجاهدین په ځانګړي ډول د توپچي قواؤ مجاهدین د افغانستان د ځمکنۍ بشپړتیا او اسلامي نظام د ساتنې او د خلکو د امنیت د تامین لپاره هیڅ راز هڅې نه درېغوي او په دې لار کې د اسلامي امارت رهبرۍ د فرمانونو اجرا ته اماده دي.
د ریاست الوزراء اداري مرستیال محترم مولوي عبدالسلام حنفي د ملي دفاع وزارت د توپچي قواؤ له قومندان او د بلخ ولایت له مجاهدینو سره پر کتنې خوښې څرګنده او د یاد ولایت د خلکو او مجاهدینو سرښندنې یې وستایلې.
د ریاست الوزراء اداري مرستیال توپخانه د ملي دفاع وزارت یوه له اړینو برخو وبلله وې ویل، توپچي قواوې د یاد وزارت له نورو برخو سره په همغږۍ له هیواد څخه د ساتنې په برخه کې مهمه ونډه لري او د دغې دندې د لا ښه ترسره کولو لپاره د مجاهدینو شپه او ورځ نه ستړې کېدونکې هلې ځلې غواړي.
محترم مولوي عبدالسلام حنفي د بلخ ولایت د ښوونې او روزنې او روغتیا په برخه کې څرګنده کړه، اسلامي امارت د خپل توان په محدوده کې هڅه کوي چې د افغانستان ټولو ولسونو ته د ښوونې او روزنې او روغتیا ته د لاسرسي زمینه برابره کړي.
