په هغه غونډه کې چې په همدې مناسبت د حکومت د اطلاعاتو او رسنیو په مرکز کې ترسره شوه، ملت ته د دولت حساب ورکولو پروګرام د افغانستان اسلامي امارت د ریاست الوزرا عالي مقام د دفتر لوی رئیس محترم ډاکتر ملا عبدالواسع، د ریاست الوزرا عالي مقام د دفتر لوی ریاست د عامه او ستراتیژیکو اړیکو معاون، محترم مولوي احمد الله متقي او د افغانستان اسلامي امارت مرستیال ویاند، محترم بلال کریمي لخوا، د بېلابېلو ادارو او رسنیو د استازو په حضور کې پرانیستل شو.
په یاده غونډه کې د افغانستان اسلامي امارت د ریاست الوزرا عالي مقام د دفتر لوی رئیس، محترم ډاکتر ملا عبدالواسع ګډونوالو ته د ښه راغلاست ترڅنګ وویل: اسلامي امارت په هېواد کې د یوه مسئول نظام په توګه تل دا هڅې کړې ترڅو د حکومتولۍ په ټولو چارو کې شفافیت تامین کړي، هېوادوالو ته د اړتیا وړ خدمات وړاندې او د نظام له پالیسیو او د امارتي ادارو له کړنو، لاسته راوړنو او راتلونکي پلانونو څخه ګران هېوادوال خبر کړي.
محترم ډاکتر ملا عبدالواسع زیاته کړه: اسلامي امارت د اسلامي اصولو په چوکاټ کې د خبریالانو او د بیان د ازادۍ ملاتړ کوي. موږ په دې پوهیږو چې رسنۍ د ملت او د دولت ترمنځ د پله حیثیت لري او د رسنیو له لارې د ملت غږ تر دولته او همدارنګه د مسئولینو خبرې تر ولسه پورې رسوي چې دا کار د ملت او د دولت ترمنځ د تعامل او همکارۍ فضا لا پیاوړی کوي، په چارو کې شفافیت تامینیږي او د ښې حکومتولۍ سبب ګرځي. نو د هېواد د ابادۍ، سوکالۍ او پرمختګ لپاره دولت، ملت او رسنۍ ګډ مسئولیتونه لري چې باید په رېښتني توګه یې ترسره کړي.
د ریاست الوزرا عالي مقام د دفتر لوی رئیس د ټولو امارتي ادارو له مسئولینو څخه وغوښتل ترڅو په پوره اخلاص سره په دې لړۍ کې برخه واخلي او د حقایقو پربنا معلومات دې وړاندې کړي او همدارنګه د رسنیو له استازو او خبریالانو څخه یې وغوښتل ترڅو د راپورونو په ترتيب کې خپله بې طرفي او مسلکیتوب حفظ کړي او د حقایقو پر اساس دې راپورونه ترتیب او نشر کړي تر څو حقایق تر خلکو ورسیږي او د ناسمو او ناموثقو معلوماتو د خپراوي مخه ونیول شي.
ورپسې، د ریاست الوزرا عالي مقام د دفتر لوی ریاست د عامه او ستراتيژيکو اړیکو معاون، محترم مولوي احمد الله متقي خبرې وکړې.
محترم مولوي احمد الله متقي وویل: ملت ته د دولت حساب ورکولو پروګرام هر کال د حکومت د اطلاعاتو او رسنیو په مرکز کې ترسره کیږي چې په دې پروګرام کې ټولې دولتي ادارې د تېر یوه کال د کړنو او لاسته راوړنو راپور له رسنیو او د رسنیو له لارې له ملت سره شریکوي.
محترم مولوي احمد الله متقي، ملت ته د دولت حساب ورکولو پروګرام ته په اشارې زیاته کړه: د اسلامي اصولو په چوکاټ کې موږ پوره هڅه کوو چې د خبریالانو او د بیان ازادۍ ملاتړ وکړو ترڅو رسنیز فعالیتونه په هېواد کې پیاوړي او غښتلي شي، د خلکو باور او اعتماد پر نظام زیات شي، حقایق ترخلکو ورسیږي، د ملت او د دولت ترمنځ د تعامل او همکارۍ فضا لا پیاوړي او اغیزمنه شي او د منفي تبلیغاتو مخه ونیول شي.
د عامه او ستراتیژیکو اړیکو معاون د ټولو امارتي ادارو له مسئولینو او مشرانو او همدارنګه د رسنیو له استازو او خبریالانو څخه مننه او قدرداني وکړه چې تېر کال یې په دغه پروګرام کې ونډه واخیسته او کلني راپورونه یې له ولس سره شریک کړل.
همدارنګه، د افغانستان اسلامي امارت مرستیال ویاند، محترم بلال کریمي په غونډه کې خبرې وکړې او زیاته یې کړه: دا د شکر ځای دی چې یو مسئولیت پذیر نظام لرو او ملت ته د خپلو کړنو په اړه په داوطلب ډول حساب ورکوي؛ د حساب ورکولو په ترڅ کې شفافیت رامنځته کېږي او پر نظام د خلکو باور زیاتوي.
محترم بلال کریمي وویل: مونږ متعهد او مسئولیت منونکي مسئولین لرو چې د هېواد د اقتصادي او هر اړخیزه پرمختګ لپاره یې هڅې پیل کړي او په راتلونکي کې به د یو لوی تحول شاهدان یوو. محترم کریمي د رسنیو له مسئولینو او خبریالانو څخه مننه وکړه چې تېر کال یې په مسلکي توګه ملت ته د دولت حساب ورکولو پروګرام ته پوښښ ورکړ او د رسنیو له مسئولینو او خبریالانو څخه یې وغوښتل چې سږکال هم په مسلکي او بیطرفه ډول دغه پروګرام ته پوښښ ورکړي او د حکومت لاسته راوړنې تر ولس ورسوي.
