د صنعت او سوداګرۍ وزارت مسؤلینو د حکومت د اطلاعاتو او رسنیو په مرکز کې ملت ته دولت حساب ورکولو پروګرام په څلورمه ورځ؛ د یوه مطبوعاتي کنفرانس پر مهال، د یاد وزارت د یو کلنو کړنو او لاسته راوړنو راپور له رسنیو سره شریک کړ.
د صنعت او سوداګرۍ وزارت سرپرست، محترم نورالدین عزیزي، چې په خبري کنفرانس کې د وزارت د فعالیتونو په اړه معلومات ورکول، وویل: په تېر کال کې مو د اسلامي امارت د اقتصادي پالېسۍ په پام کې نیولو سره، د صادراتو پراختیا لپاره ګڼ شمېر او مناسبې برنامې په لار اچولي چې له امله یې د افغانستان صادرات شاوخوا ۲ میلیارډ ډالرو ته رسېدلي دي.
دغه راز ښاغلي عزیزي زیاته کړه، د تېر یوه کال پر مهال ۸۰ سلنه فابریکې فعاله شوي، له داخلي تولیداتو د استفادې او ترویج طرحه، د اسلامي امارت کابینې ته وړاندې شوې، د صنعت کارانو انتفاعي مالیه له ۴ سلنې څخه ۲ سلنې ته را ټیټه شوې او ۷ سلنه موضوعي مالیه معاف شوې ده.
د ښاغلي عزیزي د معلوماتو له مخې، تېر کال د صنعت او سوداګرۍ وزارت د سوداګرۍ برخه کې د صادراتو او ترانزیت زیاتوالي، بازار د تنظیم، سوداګرۍ بیلانس د ښه والي لپاره؛ نندارتونونه جوړ شوي او د سیمې په کچه فعاله سوداګریزه دیپلوماسي تطبیق شوې، له ګاونډیو هېوادونو سره د سوداګرۍ د پیاوړتیا لپاره مذاکرات شوي او په یادو هېوادنو کې د افغان سوداګرو ستونزو ته رسېدنه شوې او د هېواد په کچه د لومړنیو توکو بازارونه تنظیم او بیې کنترول شوي دي.
د سوداګرۍ وزارت سرپرست زیاته کړه، چې کورنیو شرکتونو په بېلابېلو سکتورونو کې څه باندې ۱۵۰ میلیون ډالره پانګونه کړې او د بهرنیو پانګوالو د جلبولو لپاره دوامداره هڅې شوي دي.
د ښاغلي عزیزي په وینا، د صادراتو پراختیا، صنعتي او تولیدي فابریکو د ډېټابېسونه رامنځته کول، د الکترونیکي حکومتولۍ د ترویج په موخه، له مالیې وزارت سره د سوداګرۍ وزارت د سیستمونو نښلول او د اختراعاتو او صنعتي طرحو ثبتولو سیستمونو رامنځته کول، د خدمتونو برخه کې د سوداګرۍ وزارت له فعالیتونو څخه دي.
د سوداګرۍ پراختیا او د صادراتو زیاتول، د سیستمونو ایجاد او انکشاف، د صنایعو وده او پراختیا، د کورنیو او بهرنیو پانګوالو جلبول، د ځانګړو اقتصادي زونونو رامنځته کول او د متوسطو او وړو تشبثاتو پراختیا، د ۱۴۰۲ کال لپاره د سوداګرۍ وزارت له عمده پلانونو څخه دي.
د صنعت او سوداګرۍ وزارت: د افغانستان صادرات شاوخوا ۲ میلیارډ ډالرو ته رسېدلي دي
