د افغانستان اسلامي امارت د ریاست الوزراء سیاسي مرستیال محترم مولوي
عبدالکبیر د ننګرهار ولایت د بېلابېلو ولسوالیو له یو شمېر علماوو او قومي مخورو سره ولیدل.
یادو علمای کرامو او قومي مشرانو په ننګرهار کې د اسلامي امارت مسوولینو سره د خلکو پر همکارۍ خبرې وکړې او ډاډ یې څرګند کړ، چې د یاد ولایت ټول مېشت قومونه له ځايي مسئوولینو سره د امنیت په ټینګښت کې همغږي دي.
دوی زیاته کړه، د ننګرهار په سرحدي سیمو کې خلک له بې وزلۍ سره مخ دي، حکومت، مرستندویه موسسې او خیریه بنسټونه دې له خلکو سره بېړنۍ مرستې وکړي.
هغوی همدارنګه په یو شمېر سیمو کې د سړک د خرابوالي او د روغتیايي خدماتو د کموالي یادونه وکړه او د دغو برخو د پراختیا غوښتونکي شول.
د ریاست الوزراء سیاسي مرستیال محترم مولوي عبدالکبیر دوی ته وویل، د جهاد په ټولو دورو کې د ننګرهار ولسونو د نورو افغانانو په څېر ډېرې قربانۍ ورکړې دي او د افغانستان په خپلواکۍ کې یې مهمه ونډه اخیستې ده.
نوموړي زیاته کړه، د هېواد د آبادۍ په بهیر کې اسلامي امارت د خلکو د ژوند د سطحې لوړولو ته جدي پام کوي او ډېر تمرکز خلکو ته د خدماتو پر چمتو کولو دی.
محترم مولوي عبدالکبیر، د ننګرهار علماوو او مخورو ته ډاډ ورکړ چې د ستونزو حل ته به یې جدي توجه وشي.
د ننګرهار ولایت د بېلابېلو ولسوالیو علماوو او مشرانو سره د ریاست الوزرا سیاسي مرستیال کتنه
