د امر بالمعروف، نهې عن المنکر او شکایتونو اورېدلو وزارت مسئولینو، د سه شنبې په ورځ ( ۷ وری ۱۳۰۴) د حکومت د اطلاعاتو او رسنیو په مرکز کې د یوه مطبوعاتي کنفرانس پر مهال، د شکایتونو اورېدلو قانون د توشیح په اړه، رسنیو سره معلومات شریک کړل.
د یاد وزارت د شکایتونو اورېدلو مرستیال، محترم شېخ سیدعلي صدیق الله، په دغه خبري کنفرانس کې وویل: د شکایتونو اورېدلو قانون د عالیقدر امیر المؤمنین (حفظه الله) د ۹/۲/۱۴۴۴ هـ ق نېټې د ۱۱۳ ګڼې حکم پر بنسټ ترتیب او د نوموړي د ۳۰/۷/۱۴۴۵ هـ ق نېټې د ۴۱۲ ګڼې فرمان په اساس توشیح او د توشیح له نېټې څخه نافذ دی.
ښاغلي صدیق الله زیاته کړه، دغه قانون، چې یوه مقدمه، دوه فصلونه او ۲۳ مادې لري؛ موخه یې د امارتي ادارو له مسئولینو او کارکوونکو څخ، د خلکو شکایتونو ته رسېدنه او د عدالت تامینول دي.
د امر بالمعروف، نهې عن المنکر او شکایتونو اورېدلو وزارت د شکایتونو اورېدلو مرستیال په خبره، د یاد قانون تطبیق به د مظلومو کسانو شکایتونو ته د رسېدنې او د هغوی له حقوقو څخه د دفاع زمینه برابره کړي، چې له امله به یې ولس او حکومت نوره هم سره نېږدې شي.
دغه راز، ښاغلي شېخ صدیق الله وویل، چې د پخوا په پرتله په مرکز او ولایتونو کې د شکایتونو ثبتولو په کچه کې د پام وړ کموالی راغلی دی. نوموړي د شکایتونو ثبتولو په کچه کې د کموالي لامل؛ دې برخې ته د امارتي مسئولینو جدي پاملرنه په ګوته کړه.
د امر بالمعروف، نهې عن المنکر او شکایتونو اورېدلو وزارت، د شکایتونو اورېدو لپاره، څلور شمېرې د هېوادوالو په واک کې ورکړي چې په ۲۴ ساعته ډول فعاله دي، څو هېوادوال وکولی شي چې په اسانه ډول خپل شکایت له دغه وزارت سره ثبت کړي.
امر بالمعروف وزارت: د عالیقدر امیر المؤمنین (حفظه الله) لخوا د شکایتونو اورېدلو قانون توشیح شو
