د ریاست الوزراء سیاسي مرستیال محترم مولوي عبدالکبیر د افغان او ایراني سوداګرو له ګډ پلاوي سره په سپیدار ماڼۍ کې وکتل.
د دې کتنې په پیل کې ایراني سوداګرو په خپلو خبرو کې وویل، غواړي په افغانستان کې د ۱۰۰ میلیونو ډالرو په ابتدايي پانګه، پانګونه وکړي او ګڼې تولیدي فابریکې فعالې کړي.
یادو سوداګرو زیاته کړه، د وخت په تېرېدو به دوی د خپلې پانګې کچه نوره هم لوړه او ګڼو افغانانو ته به د کار زمینه برابره کړي. دوی څرګنده کړه، په تېر نظام کې یې هم په افغانستان کې کار او فعالیت پیل کړی و، خو د فساد او د دولت د نه همکارۍ له کبله یې خپل کارونه ودرول.
ایراني سوداګرو زیاته کړه، غواړي له افغان سوداګرو سره په ګډه یو ستر شرکت جوړ او په افغانستان کې د کانونو او صنعت په بېلابېلو برخو کې پانګونه وکړي. دوی د افغانستان اسلامي امارت څخه په دې اړه هر اړخیزه همکاري وغوښته.
د ریاست الوزراء سیاسي مرستیال محترم مولوي عبدالکبیر له دوی په مننې وویل، اسلامي امارت د ټولو کورنیو او بهرنیو پانګوالو هرکلی کوي او هر ډول اسانتیاوې ورته برابروي.
محترم مولوي عبدالکبیر په ټینګار سره وویل، ټول پانګوال په افغانستان کې له کومې وېرې او اندېښنې پرته پانګونه کولی شي او د افغانستان اسلامي امارت یې د هر ډول امنیت تضمین کوي.
په پای کې د ریاست الوزراء سیاسي مرستیال د افغان او ایراني سوداګرو ګډ پلاوي ته په خطاب کې د دوی د کارونو د ښه پرمختګ او پراختیا په موخه اړوندو ادارو ته لازمې لارښوونې او سپارښتنې ډاډ هم ورکړ.#
