د افغانستان اسلامي امارت د ریاست الوزراء سیاسي مرستیال محترم مولوي عبدالکبیر نن د قاضي ګل الرحمن په مشرۍ د افغانستان خصوصي پوهنتونونو ټولنې رهبري پلاوي سره وکتل.
په دې کتنه کې، د یادې ټولنې مشرتابه په افغانستان کې د واقعي اسلامي نظام ټینګښت د افغانانو غوښتنه یاده کړه وې ویل، د اسلامي نظام د استحکام او ثبات لپاره اسلامي امارت سره هر راز همکارۍ ته چمتو دي.
هغوی وویل، دوی په سختو شرایطو کې د افغانستان د باسواده کېدو او د هېواد د پرمختګ لپاره د لوړو زدکړو په برخه کې پانګونه کړې ده.
د دې ټولنې راغلي پلاوي په هېواد کې د نجونو پر وړاندې د ښوونځیو او پوهنتونونو د دروازو پرانېستو غوښتنه وکړه او په دې برخه کې يې خپل وړانديزونه او مشورې شريکې کړې زياته يې کړه، له پوځي او سیاسي بریا وروسته اړتیا ده اوس په اقتصادي او علمي برخو کې هم افغانستان واقعي خلپواکۍ او ځان بسياينې ته ورسېږي.
د ریاست الوزراء سیاسي مرستیال له دوی څخه په مننې وویل، افغانستان او اسلامي امارت د ټولو افغانان شریک کور دی او هر افغان پکې د نظر او مشورې ورکولو حق لري.
نوموړي وویل، اسلامي امارت د نجونو د زده کړو مخالف نه دی، خو هڅه کوي رامنځته شوی ځنډ ژر له منځه ولاړ شي.
مولوي صاحب عبدالکبیر د خپلو خبرو په پای کې زياته کړه، افغانستان په بېلابېلو برخو کې متعهدو او ژمنو کادرونو ته اړتیا لري او ډاډ یې ورکړ چې پر نظرياتو او مشورو به يې غور وشي.#
