د افغانستان اسلامي امارت د ریاست الوزرا اداري مرستیال محترم مولوي عبدالسلام حنفي د عامې روغتیا وزارت سرپرست محترم ډاکتر قلندر عباد او د دې وزارت له یو شمېر مسوولینو سره پخپل کاري دفتر کې وکتل.
په دې کتنه کې، لومړی محترم ډاکتر قلندر عباد د هیواد د عمومي روغتیایي وضعیت، په دولتي روغتونونو کې د اصلاحاتو لپاره د عامې روغتیا وزارت طرحې، د روغتیا په برخه کې د عمومي او خصوصي سکتور د مشارکت طرحې، په دولتي روغتونونو کې د دندو ترسره کولو لپاره د متخصصو ډاکترانو هڅولو او د روغتونونو اړتیا وړ اجناسو برابرولو په موخه د تدارکاتي بهیر ساده کولو په اړه د ریاست الوزرا اداري معاونیت مقام ته مفصل معلومات وړاندې کړل.
نوموړي د اسلامي امارت رهبرۍ څخه وغوښتل چې په هیواد کې د عامې روغتیا موضوع اهمیت ته په کتو د دې وزارت طرحو او وړاندیزونو ته ځانګړې پاملرنه وکړي.
د ریاست الوزرا اداري مرستیال محترم مولوي عبدالسلام حنفي د عامې روغتیا وزارت مسوولینو سره په دې کتنې د خوښۍ څرګندولو ترڅنګ، د دې وزارت د تخصصي او مسلکي برخو د فعالیتونو او کړنو قدراني وکړه.
د ریاست الوزرا اداري مرستیال روغتیایي سکتور د هیواد تر ټولو مهمه برخه وبلله زیاته یې کړه، د اسلامي امارت رهبري او مسوولین د عامې روغتیا برخې ته ځانګړې پاملرنه لري او په روغتیایي سکتور په ځانګړي ډول دولتي روغتونونو کې د اصلاحاتو ترسره کول ډېر اړین دي.
نوموړي د عامې روغتیا وزارت مسوولینو ته په خطاب کې وویل، اصلاحات باید له یوه روغتون څخه پیل او په تدریج پراخ شي.
د رئیس الوزرا اداري مرستیال په دولتي روغتونونو کې د اصلاحاتو په ترسره کولو د ټینګار ترڅنګ وویل، هغه روغتیایي پروژې چې چارې یې له ۸۰ تر ۹۰ سلنې بشپړې شوې دي او ټولنه ورته ډېره اړتیا لري د عامې روغتیا وزارت د ۱۴۰۲ مالي کال په انکشافي بودجه کې به په پام کې ونیول شي.
