له هغه وروسته چې د اسټرالیا کرکټ بورډ له افغانستان سره خپلې پلان شوې درې لوبې لغوه کړې، د افغانستان کرکټ بورډ مشر میرویس اشرف وايي چې متحدو عربو اماراتو ته تللی او هلته د کرکټ نړیوالې شورا مشرتابه ډاډ ورکړی چې افغان کرکټ سره هره برخه کې ولاړ دي.
د افغانستان کرکټ بورډ مشر میرویس اشرف پر خپلې فېسبوک پاڼه ليکلي: له تېرې یوې اونۍ راهیسې په متحده عربي اماراتو کې یم، په یاده موده کې مې د کرکټ نړیوالې شورا د مشرتابه او استازو سربېره د بېلابېلو ناستو په ترڅ کې د یو شمېر هېوادونو د کرکټ بورډونو له مشرانو سره له نږدې لیده کاته وکړل، او له ځینو سره مې هم د ټیلیفون له لارې خبرې وکړې.
د هغه په وینا، دغه راز يې په یادو ناستو کې د کرکټ بورډونو له مشرانو سره د سیالیو په ترسراوي خبرې وکړې چې ډېر مثبتې پایلې یې درلودې چې په دې اړه به هم هېوادوالو ته نوي زېري ولري. دوی پوره ډاډ ورکړی چې له موږ سره په هره برخه کې ولاړ دي او د افغانانو کرکټ ورته ډېر اهمیت لري.
د ده په خبره، افغان کرکټ بورډ تل له ټولو بورډونو سره خپلواکې او غوره اړیکې ساتلې دي او دغه راز نور بورډونه هم له افغان کرکټ سره ډېرې ټینګې اړیکې لري او همېشه یې د افغان لوبغاړو او ادارې قدردانی او ستاینه کړې ده.
