د افغانستان اسلامي امارت د ریاست الوزراء د دفتر عمومي رئیس محترم ډاکتر ملا عبدالواسع په افغانستان کې د ناروې کمېټې (NAC) مشر ښاغلي تاریه مګنوسن واتردال په مشرۍ پلاوي سره، چې د دولت په چارو کې د افغانستان لپاره د ناروې مٶسسې استازي مجیب شېرزوی، نجیب کوهي او غفار رحمتي هم حضور درلود، په ارګ کې وکتل.
په پیل کې، ښاغلي تاریه مګنوسن واتردال د امنيت تامين او د دوی د کاري ملاتړ له امله د اسلامي امارت مننه وکړه او زياته يې کړه، دغه کمېټه په افغانستان کې د تعلیم او تربیې، مکاتبو جوړولو، صحي خدماتو، کرنې، غذایي مصؤنیت او طبیعي زېرمو ساتلو په برخو کې خدمات وړاندې کوي.
نوموړي وويل، د یادې کمیټې ټولې برنامې له حکومت سره په همغږۍ ترسره کېږي او په پورته برخو کې يې د خپلو فعاليتونو په اړه مفصل معلومات شريک کړل.
د ریاست الوزراء د دفتر عمومي رئیس محترم ډاکټر ملا عبدالواسع دوی ته د ښه راغلاست ترڅنګ وویل، پدې حساسو شرایطو کې د افغانانو لپاره ستاسو د خدمتونو قدرداني کوو او د لا زیاتې همکارۍ ډاډ درکوو. د ښارونو ترڅنګ لرې پرتې سيمې ځانګړې پاملرنې ته اړتيا لري.
محترم ډاکتر عبدالواسع زياته کړه، د څلوېښت کلنې جګړې له وجې خلک له غربت او ستونزو سره لاس او ګرېوان دي او د خيريه بنسټونو د فعاليتونو ستاينه کوو. د شته امکاناتو په چوکاټ کې ستاسو خونديتوب زموږ لومړيتوب دی. د خپلو خبرو په پای کې د رياست الوزرا د دفتر عمومي رئيس وويل، سراسري امنيت تامين شوی او وخت رسېدلی چې پانګه وال او سوداګر په کور دننه په پانګونې سره هيوادوالو ته کاري زمينه مساعده او د اقتصاد په وده کې رول ولوبوي.
