د کورنيو چارو وزارت له نشهيي توکو سره د مبارزې مرستيال وایي، په ننګرهار ولايت کې سږ کال پر ۹۰۰۰ جريب ځمکه کرل شوي کوکنارو له منځه وړل شوي دي.
دغه څرګندونې د کورنيو چارو وزارت له نشهيي توکو سره د مبارزې مرستيال لوی پاسوال ملا عبدالحق اخندزاده د کب په ۶مه جلالاباد ښار کې له نشهيي توکو سره د مبارزې په اړه جوړې شوې غونډې ته وکړې.
په دې غونډه کې د کورنيو چارو وزارت مسوولينو او د ننګرهار د چارواکو ترڅنګ د دغه ولايت قومي مشرانو او عامو خلکو هم برخه اخیستې وه.
ياده غونډه خلکو ته د اسلامي امارت د مشر د هغه فرمان اورولو په تړاو جوړه شوې وه چې د نشهيي توکو کر، کاروبار، پلور او پېر باندې په کې بنديز لګول شوی دی.
د کورنیو چارو وزارت له نشهيي توکو سره د مبارزې مرستيال لوی پاسوال ملا عبدالحق اخندزاده وويل، د اميرالمؤمنين د ۴۰۵ ګڼه فرمان له مخې چې د ۱۴۴۲ کال په وروستيو کې صادر شوی، په ټول هېواد کې د هر ډول نشهيي توکو کښت، کاروبار، پېر او پلور بند دی او له سرغړوونکو سره به د قانون له مخې چلند وشي.
نوموړي وويل، په ننګرهار کې نهه زره جريب ځمکه د کوکنارو له کښته پاکه شوې، خو په نازيانو، سپینغر او اچين ولسواليو کې په کمه اندازه پاتې ده چې ډېر ژر به پاکه شي.
په ياده غونډه کې د ننګرهار ځایي چارواکو هم ډاډ ورکړ چې د کوکنارو د کښت، قاچاق او نشهيي توکو مخنيوي برخو کې به هلې ځلې لا ګړندۍ کړي.
