د اطلاعاتو او کلتور وزارت د ځوانانو چارو معینیت او خصوصي پوهنتونونو ترمنځ د همکارۍ هوکړه لیکونه، د سه شنبې په ورځ (کب ۹) د حکومت د اطلاعاتو او رسنیو په مرکز کې د یوې خبري ناستې پر مهال د یاد وزارت او خصوصي پوهنتونونو د مسوولینو ترمنځ لاسلیک شول.
د اطلاعاتو او کلتور وزارت د ځوانانو چارو مرستیال، مولوي محمد یونس راشد وویل: د افغانستان اسلامي امارت د ځوانانو هر اړخیز پرمختګ ته ژمن دی او تل یې د ځوانانو د تحصیل او کارموندنې برخه کې د دغه وزارت د پروګرامونو ملاتړ کړی دی.
ښاغلي راشد زیاته کړه، د ځوانانو ستونزو او غوښتنو د اورېدو او حل په موخه مو ولایتي سفرونه وکړل او په ۱۷ ولایتونو کې مو له زرګونو ځوانانو سره مخامخ ناستې او خبرې وکړې، د ټولو ځوانانو غوښتنه دا وه چې په کابل کې د تحصیل زمینه ورته برابره شي، مونږ هم ژمنه ور سره وکړه او دا دی نن په کابل کې له ۴۰ خصوصي پوهنتونو او د لوړو زده کړو موسسو سره په همدا تړاو د همکارۍ هوکړه لیکونه، لاسلیکوو.
دغه راز د اطلاعاتو او کلتور وزارت د ځوانانو چارو مرستیال، ځوانانو ته د تحصیلي زمینې برابرولو برخه کې د خصوصي پوهنتونونو مسوولینو د همکارۍ او تخفیف ستاینه وکړه، وې ویل دغه معینیت ۱۰۰۰ تنه بېوزله ځوانانو ته په کابل کې د لیلیې امکانات هم برابر کړي دي.
همدارنګه ښاغلي راشد وویل: د ځوانانو چارو معینیت به هغو ځوانانو ته هم د کار زمینه برابره کړي چې لوړې زده کړې یې کړي او تر اوسه بې روزګاره دي.
د ناستې په جریان کې د خصوصي پوهنتونونو مسوولینو هم د ځوانانو چارو معینیت دا هڅې وستایلې او ژمنه یې وکړه چې په خپل ټول توان به، له دغه معینیت سره خپلې همکارۍ ته، دوام ورکړي.
