د افغانستان اسلامي امارت د ریاست الوزراء سیاسي مرستیال محترم مولوي عبدالکبیر نن پخپل کاري دفتر کې د هېواد له یو شمېر ملي سوداګرو او پانګه والو سره وکتل.
په دې ناسته کې، حاجي جلال او محمد نعیم ځاځي د نورو په استازيتوب خبرې وکړې او د امن فضا په رامنځته کېدو د خوښۍ ترڅنګ يې اسلامي امارت ته د همکارۍ ډاډ ورکړ.
دوی چمتووالی وښود، چې په هیواد کې د پانګونې له شته فرصتونو څخه په استفادې به نور سوداګر او پانګه وال هم وهڅوي. همداراز خپلې ستونزې يې هم شریکې کړې.
د ریاست الوزراء سیاسي مرستیال محترم مولوي عبدالکبیر وویل، د افغانستان رغاونه او اقتصادي پیاوړتیا د افغانانو په یووالي او په کور دننه پانګونې پورې تړلې ده.
نوموړي زياته کړه، د خوښۍ خبره ده، چې موږ هره ورځ په افغانستان کې د اقتصادي فرصتونو غوړېدا په اړه مثبت خبرونه لرو.
د رياست الوزرا سياسي مرستيال د خپلو خبرو پای کې دېته په اشارې چې اسلامي امارت د سوداګرو او پانګه والو هر اړخيز ملا کوي ډاډ ورکړ، چې د دوی ستونزې به په اساسي ډول حل شي.#
د ریاست الوزراء سیاسي مرستیال: د سوداګرو او پانګه والو ستونزې په اساسي ډول حلوو
