د صنعت او سوداګرۍ وزارت وايي، له دریو کلونو راهیسې هند ته د هېواد د صادراتو په کچه کې ډېروالی راغلی او افغانستان په ۱۴۰۱ کال کې هند ته د ۴۱۷ مېلیونه ډالرو په ارزښت توکي صادر کړي.
د دې وزارت په وینا، افغانستان هند ته په ۱۳۹۹ کال کې د ۴۰۵ مېلیونه ډالرو په ارزښت او په ۱۴۰۰ کال کې د ۳۱۱ مېلیونه ډالرو په ارزښت توکي صادر کړي.
له دې سره هممهاله، د سوداګرۍ او پانګونې خونه وایي، هند د افغانستان د توکو لپاره یو ښه بازار دی.
بلخوا، یو شمېر سوداګر له اسلامي امارته غواړي چې د سوداګریزو اړیکو د زیاتولو لپاره نورې اسانتیاوې برابرې کړي.
د صنعت او سوداګرۍ وزارت شمېرې ښيي چې په ۱۴۰۱ کال کې د افغانستان صادرات نږدې دوه مېلیارډ ډالرو ته رسېدلي دي چې تر ټولو ډېر صادرات، پاکستان، هند، چین، متحده عربي اماراتو او ایران ته شوي دي.
