د ارشاد، حج او اوقافو وزارت سرپرست، محترم شېخ الحدیت دوکتور نور محمد ثاقب، د یکشنبې په ورځ (۱۳ ثور ۱۴۰۲) د حکومت د اطلاعاتو او رسنیو په مرکز کې د یوه خبري کنفرانس پر مهال، رسنیو ته په روان کال کې د حج پروسې د سهمیې او لګښتونو په اړه معلومات ورکړل وې ویل: سږکال به ۳۰ زره حاجیان، سعودي عربستان ته د حج مناسکو د ادا کولو لپاره لاړ شي.
د ارشاد، حج او اوقافو وزارت سرپرست زیاته: دغه سهمیه د حاجیانو د تقاضا پر بنسټ تنظیم شوې ده، چې عام خلک، مجاهدین، د امارتي ادارو کارکوونکي، د شهیدانو او معلولینو وارثین او کډوال پکې شامل دي.
د ښاغلي ثاقب په وینا، د زونونو په کچه د حاجیانو د ټولېدنې ځایونه تجهیز او ترمیم شوي دي، دغه راز له کام ایر هوایي شرکت سره د قرارداد تر څنګ؛ سږکال به له څلور زونونو (کابل، هرات، بلخ او کندهار) نه الوتنې ترسره شي.
د ارشاد، حج او اوقافو وزارت سرپرست وایي، چې په مکه معظمه او مدینه منوره کې د حاجیانو لپاره د اوسېدنې ځایونو، درې وخته ډوډۍ او ترانسپورټ اسانتیاوې په پام کې نیول شوي او تمه ده چې د حاجیانو لومړنۍ الوتنه به د روان کال د غبرګولي په لومړۍ نېټه؛ د افغانستان له خاورې څخه سعودي عربستان ته تر سره شي.
همدارنګه ښاغلی ثاقب زیاتوي، د هېواد ۳۴ ولایتونو کې د ازادې سیالۍ پروسې له لارې وړ او درایت لرونکي ښوونکي جذب شوي، چې سږکال به په ټولیز ډول ۶۵۲ ښوونکي د حاجیانو ملتیا کوي او د ۴۵ حاجیانو لپاره یو ښونکی توظیف شوی دی.
د ارشاد، حج او اوقافو وزارت سرپرست په خبره، د وزارت د مسوولینو په هڅو او کوښښونو، سږکال د هر حاجي لپاره ۳۹۲۴ ډالر چې ۳۴۰ زره افغانۍ کېږي، لګښت په پام کې نیول شوی دی.
سږکال به ۳۰ زره حاجیان، سعودي عربستان ته د حج مناسکو د ادا کولو لپاره لاړ شي
