د کندهار ولايت لپاره د افغانستان د خوړو او درملو ملي ادارې د کيفيت کنټرول لابراتوار د افغانستان اسلامي امارت د لوړ پوړو چارواکو، علمای کرامو او د ياد ولايت د مجاهدينو او مشرانو په حضور کې د قرانکریم د څو مبارکو ايتونو په تلاوت او د مشرانو په عالمانه ويناوو پرانيستل شو.
د پرانيستې وينا کې د افغانستان اسلامي امارت د رياست الوزرا اداري مرستيال محترم مولوي عبدالسلام حنفي د خوړو او درملو ملي ادارې پر اهميت او مقام د ټينګار ترڅنګ د کندهار ولايت نجيبو ولسونو او مجاهدینو ته د دې سترې لاسته راوړنې مبارکي وويله.
نوموړي ټينګار وکړ، تر دې وروسته چې ټول خوراکي توکي هيواد ته واردېږي بايد د دې ادارې د کيفيت کنټرول لابراتوارونو کې معاينه او وروسته دې زموږ د هيوادوالو د لاسرسي وړ وګرځي.
د رياست الوزرا اداري مرستيال زياته کړه، د خلکو او ماشومانو روغتيا ساتل د دولت او د ټولو سوداګرو چې درمل او خوراکي توکي هيواد ته واردوي، ګډه وجيبه ده.
محترم مولوي عبدالسلام حنفي د خپلو خبرو پای کې وويل، د تخلف په صورت کې له متخلفينو سره نه يوازې قانوني چلند کېږي، بلکې د هغوی د فعاليت جواز هم لغوه کېږي.
ورپسې د خوړو او درملو ملي ادارې سرپرست محترم ډاکتر عبدالباري عمر راغلو مېلمنو ته د ښه راغلاست ترڅنګ د خوړو او درملو ملي ادارې پر اهميت خبرې وکړې او دغه اداره يې يوه له مهمو، حياتي او عايداتي ادارو وبلله او ګډونوالو ته يې د دې ادارې د فعاليتونو، لاسته راوړنو او ستونزو په اړه معلومات ورکړل.
نوموړي ژمنه وکړه چې په نږدې راتلونکي کې به د درملو د کنټرول ۴ لوی لابراتوارونه په زونونو او د خوړو د کنټرول ۸ لابراتوارونه په ولايتونو کې جوړ شي.
ښاغلي عبدالباري عمر د دې لابراتوار ارزښت نږدې دوه سوه او پنځوس زره ډالره وباله زياته يې کړه، اوسنی لابراتوار په ورځ کې له ۱۰۰ څخه د زياتو ډولونو د معاينې ظرفيت لري.
همداراز د هيواد له سوداګرو يې وغوښتل، ترڅو په قانوني وارداتو او د باکيفيته توکو په واردولو سره خپله ايماني او انساني وجيبه ترسره کړي.
د غونډې پای کې، د سوداګرۍ خونو رئيس حاجي محمد يونس مهمند د دې لابراتوار پرانيسته د سوداګرو د ستونزو حل په برخه کې مثبت ګام وباله او له سوداګرو يې وغوښتل، ترڅو د باکيفيته خوړو او درملو وارداتو ته لومړيتوب ورکړي.
غونډه د پټۍ په پرې کولو او د خوړو د کيفيت کنټرول لابراتوار په پرانيستې پایته ورسېده.
