د افغانستان اسلامي امارت د ریاست الوزرا اداري مرستیال محترم مولوي عبدالسلام حنفي د تخار ولایت یو شمېر علماو او متنفذینو سره وکتل.
په دې کتنه کې محترم شخ الحدیث مولوي محمد عثمان د نورو په استازیتوب د خبرو پر مهال په هیواد کې د سراسري امنیت په تامین او د غوره خدماتو برابرولو خوښي وښوده.
هغه زیاته کړه، د تخار ولایت خلکو له اشغالګرو سره مبارزه او د هیواد په ازادي کې زیاتې هلې ځلي کړي او د اسلامي نظام د ساتنې په موخه یې هیڅ ډول کوښښونه نه دي درېغ کړي او نه یې درېغوي.
هغه وویل، د افغانستان اسلامي امارت مسوولین په تخار ولایت کې د خدماتو رسولو کوښښ کوي او د دې ولایت خلک هم له دې بابته خوښي څرګندوي او په پای کې د افغانسنان اسلامي امارت له مسوولینو څخه د ښوونې او روزنې په برخه کې د زیاتې پاملرنې غوښتونکي شو.
د افغانستان اسلامي امارت د ریاست الوزرا اداري مرستیال محترم مولوي عبدالسلام حنفي په دغه کتنه د خوښي څرګندولو پرمهال په هیواد کې د اسلامي امارت نظام د بیا واکمنېدو په موخه د تخار ولایت د خلکو هڅې او کوښښونه وستایل.
هغه زیاته کړه، د اسلامي نظام ساتنه د ټولو افغانانو دنده ده او په دې کې علما او ولسي مشران مهم رول ترسره کوي.
د ریاست الوزرا اداري مرستیال همدارنګه وویل، د اسلامي امارت مسوولین د شته امکاناتو په چوکاټ کې د خلکو د ستونزو حل او په ځانګړي ډول په ټول هیواد کې ښوونې او روزنې ته پاملرنه کوي.
د تخار ولایت یو شمېر علماو او متنفذینو سره د ریاست الوزرا اداري مرستیال کتنه
