د افغانستان اسلامي امارت د ریاست الوزرا اداري مرستیال محترم مولوي عبدالسلام حنفي د تخار ولایت یو شمېر علماو او متنفذینو سره وکتل.
په دې کتنه کې محترم خلیفه صاحب محمدیوسف او مولوي صاحب عبدالغفور د نورو په استازیتوب د خبرو پر مهال په هیواد کې د سراسري امنیت په تامین، د اسلامي امارت د مسوولینو په نېک چلند، د اداري فساد په له منځه وړلو او خلکو ته په چټکو خدماتو رسولو خوښي وښوده.
هغوی زیاته کړه، د اسلامي امارت نظام په بې درېغه سرښندنو، قربانیو او هلو ځلو سره په هیواد کې تامین شوی دی او د ټولنې هر فرد باید د دې نظام د ساتنې او ملاتړ کوښښ وکړي.
هغوی همدارنګه وویل، موږ د اسلامي امارت یوو او اسلامي امارت زموږ دی او چاته د نظام د تخریب اجازه نه ورکوو.
د ریاست الوزرا اداري مرستیال محترم مولوي عبدالسلام حنفي په افغانستان کې د اسلامي نظام په ټينګښت کې د هغوی د نه ستړې کېدونکو کوښښونو قدرداني وکړه چې علما او ولسي مشران د نظام ټينګښت او د ټولنې اصلاح کې مهمه دنده لري.
هغه زیاته کړه، د اسلامي امارت ټول مسوولین د هیواد له برجسته علماوو څخه دي او تل افغانانو ته د خدماتو برابرولو په هڅه کې دي.
د ریاست الوزرا اداري مرستیال همدارنګه وویل، د دې نظام ساتنه د ټولنې د ټولو افرادو دنده ده او په دې کې باید هیڅ ډول هڅې درېغ نشي.
د فاریاب ولایت ګرزیوان ولسوالۍ یو شمېر علماو او مشرانو سره د ریاست الوزرا اداري مرستیال کتنه
