د ریاست الوزراء سیاسي مرستیال او کفيل محترم مولوي عبدالکبیر په سپېدار ماڼۍ کې د اوبو او انرژۍ له وزیر مولوي عبداللطيف منصور سره ولیدل.
په دې ليدنه کې ښاغلي منصور د یاد وزارت د کارونو، وروستیو لاسته راوړنو او راتلونکو پروګرامونو په اړه د ریاست الوزراء سیاسي مرستیال او کفيل ته هراړخيزه معلومات ورکړل.
نوموړي وویل، تېر کال سېلابونو په ځینو سیمو کې هېوادوال زیانمن کړي دي، سږکال زیانمنیدونکې سیمې تشخیص او پېښو ته د رسېدو پلان يې جوړ شوی دی.
محترم مولوي عبداللطيف منصور زیاته کړه: سږ کال اوبه تر ډېره مهار شوي او د دې وزارت مسلکي غړي هڅه کوي چې د مهارولو لپاره یې په ملي کچه برنامه جوړه او وچکالۍ ځپلو سیمو ته اوبه ورسوي او تر څنګ يې د برېښنا د تولید ظرفیت هم لوړ کړي.
نوموړي وویل، د اوبو د مهارولو په برخه کې ټولو شویو تړونونو ته ژمن دي او حقوقي موضوعات یې په نظر کې نیولي دي.
د ریاست الوزراء سیاسي مرستیال او کفيل محترم مولوي عبدالکبیر وویل، افغانستان د وچکالۍ سختې څپې ځپلی دی، کروندګر له ستونزو سره مخ دي، په اکثرو ښارونو او سیمو کې د اوبو کچه ښکته تللې چې له امله يې خلک د څښاک اوبو له ستونزو سره مخ دي.
محترم مولوي عبدالکبیر وویل، اړتیا ده چې د کابل او نورو ښارونو او سیمو لپاره د پاکو اوبو د برابرولو او وچکالۍ سره د مبارزې لپاره په اوږدمهالي او لنډمهالي پلان کار وشي.
د ریاست الوزراء سیاسي مرستیال او کفيل د خپلو خبرو په پای کې د چارو د لا زيات بهبود او ښه والي په خاطر د اوبو او برېښنا وزیر ته لازمې سپارښتنې وکړې.
