د افغانستان اسلامي امارت د ریاست الوزراء کفیل او سیاسي مرستیال محترم مولوي عبدالکبیر د اروزګان له والي مولوي محمد علي جان احمد سره وکتل.
په دې لیدنه کې ښاغلي احمد د اروزګان ولایت د وضعیت په اړه د ریاست الوزراء محترم کفیل ته معلومات ورکړل او زیاته یې کړه، په یاد ولایت کې د حکومتي ادارو چارې په منظم ډول پر مخ روانې دي.
ښاغلي احمد زیاته کړه، د جهاد پر مهال په اروزګان کې مېشتو ولسونو خورا ډېرې قربانۍ ورکړي او زحمات یې ګاللي دي، چې اوس د شهیدانو او معلولینو د ثبت پروسه روانه ده، څو ورسره مرستې وشي.
هغه وویل، تېر کال د اروزګان-کندهار لاره ورغاول شوه، خو لاهم لرې پرتو سیمو ته غزېدلي سړکونه مناسب حالت نه لري چې خلک یې د رغاولو غوښتنه کوي.
مولوي محمد علي جان احمد د اروزګان د روغتیایي کلینیکونو او لارو رغاولو په برخه کې د ریاست الوزراء کفیل ته وړاندیزونه وکړل.
د ریاست الوزراء کفیل او سیاسي مرستیال محترم مولوي عبدالکبیر په دې لیدنه کې وویل، اسلامي امارت په ټول هېواد کې د شهیدانو کورنیو او د معلولینو لاسنیوي ته د ځانګړې برنامې له لارې پام کوي، چې د اروزګان ولایت ته به په کې ځانګړې پاملرنه وشي.
مولوي عبدالکبیر زیاته کړه، په لرې پرتو سیمو کې لومړنیو خدماتو ته لاسرسی د خلکو حق دی او ټولې اړونده ادارې به محرومو سیمو ته توجه وکړي.
نوموړي په اروزګان ولایت کې د سیمه ییزو ادارو د چارو د سمون په موخه ښاغلي والي ته لازمې لارښوونې وکړې.
د ریاست الوزراء کفیل او سیاسي مرستیال د اروزګان والي سره ولیدل
