د تخنیکي او مسلکي زده کړو ادارې مسئولینو، د حکومت د اطلاعاتو او رسنیو په مرکز کې ملت ته د دولت حساب ورکولو پروګرام کې د یوه مطبوعاتي کنفرانس پر مهال، د خپلې ادارې د یو کلنو کړنو او لاسته راوړنو په اړه معلومات وړاندې کړل.
د تخنیکي او مسلکي زده کړو ادارې مسئولینو په دې خبري کنفرانس کې وویل: په مرکز او ولایتونو کې د ۵۶۸۵۰ تنه زده کوونکو او محصلینو لپاره د تخنیکي او مسلکي زده کړو زمینه برابره شوې ده.
د تخنیکي او مسلکي زده کړو ادارې مسئولینو په وینا، د ۳۸۷۲ زده کوونکو لپاره د ۴۴ لنډمهاله حرفوي کورسونو دایرول، نورستان ولایت کې د یوه کثیر الرشتوي انسټیټوټ او په جوزجان او سرپل ولایتونو کې د دوه مسلکي لېسو رامنځته کول او د هېواد په کچه په زده کړییزو مرکزونو کې د تخنیکي او مسلکي زده کړو د ۲۵ څانګو رامنځته کول؛ د تخنیکي او مسلکي زده کړو ادارې له نورو لاسته راوړنو څخه دي.
مسئولین وایي، چې د تخنیکي او مسلکي زده کړو د بېلابېلو ښوونیزو څانګو د نصاب بیاکتنه، د ۳۸۰۰۰۰ ټوکه درسي کتابونو او ۳۷۵۰۰ ټوکه درسي موادو چاپ او وېش، د کیفیت د تضمین سیستم پراختیا، د ظرفیت لوړونې د ورکشاپونو او د تعلیم، مسلک او تحصیل د کنفرانس او نندارتون جوړول؛ په وروستي یوه کال کې د دې ادارې نور فعالیتونه دي.
دغه راز مسئولین زیاتوي، چې د تېر کال پر مهال د ادارې ستراتېژیک پلان تدوین شوی، د تقنیني اسنادو د بیاکتنې او تدوین چارې بشپړې شوي، له وزارتونو، خپلواکو ادارو او کورنیو او نړیوالو موسسو سره؛ ۹ تفاهم لیکونه لاسلیک شوي او د اسانتیا رامنځته کولو په موخه، ۱۳۹ پروسې ساده شوي دي.
