د افغانستان اسلامي امارت د ریاست الوزراء سیاسي معاونیت د دفتر عمومي رئیس مولوي ذاکر، د کابل ښار اتمې ناحیې له لسګونو علمای کرامو، د ګذر وکیلانو، متنفذینو او ځوانانو سره ولیدل.
په دې ليدنه کې راغلو علماوو او مشرانو له اسلامي امارت سره د خپلې همکارۍ ژمنه تازه کړه وې ویل، په تېرو دوو کلونو کې اسلامي امارت اساسي پروژې پیل کړې دي.
دوی زیاته کړه، په تېره اداره کې، د جنايي جرمونو، قاچاق او مخدره توکو کچه اوج ته رسېدلی وه، په ټولو دولتي او نادولتي ادارو کې فساد ځای نیولی وو، خو د اسلامي نظام له حاکمېدو سره د جرمونو، قاچاق او مخدره توکو مخه نیول شوې او په ټول هېواد کې د امن ټغر خپور شوی دی. دا چې اسلامي نظام حاکم شوی باید له دې فرصت څخه د اسلام، هېواد او هېوادوالو په ګټه، سمه استفاده وشي او افغانستان تلپاتې ثبات ته ورسول شي.
یادو مشرانو، دغه راز د اتمې ناحیې د ولسونو یو شمېر ستونزې او وړاندیزونه هم د ریاست الوزراء سیاسي معاونیت د دفتر له عمومي رئیس سره شریک کړل.
د ریاست الوزراء سیاسي معاونیت د دفتر عمومي رئیس مولوي ذاکر له راغلو علماؤ او مشرانو څخه په مننې وویل، افغانستان وروسته له ډېرو کړاوونو او تکلیفونو د ارام ساه اخیستې ده، چې باید ټول افغانان یې د ابادۍ لپاره سره یو موټی شي.
نوموړي زیاته کړه، د تاریخ په اوږدو کې پر افغانستان فکري، فرهنګي او نظامي یرغلونه وشول، خو د افغانستان غیور او مجاهد ملت یو بل ته لاسونه ورکړي او پر وړاندې یې سپر شوي چې په پایله کې يې په افغانستان کې اسلامي نظام حاکم شو.
مولوي ذاکر د خپلو خبرو په پای کې وویل، افغانستان د ټولو افغانانو شریک کور دی چې امنیت يې تامین شوی، هر افغان ته خپل حق رسېږي او په ډېرو کمو امکاناتو د بیا رغونې او ابادۍ کارونه شروع شوي دي. نوموړي ډاډ ورکړ، چې د اتمې ناحیې د اوسېدونکو ستونزې به د حل په موخه له اړوندو ادارو سره شریکې شي.
