د اسلامي امارت د مشرتابه لخوا د افغانستان پراختیایي تګلاره منظور شوه
2025-08-26
د افغانستان اسلامي امارت ویاند، محترم مولوي ذبیح الله مجاهد، د سه شنبې په ورځ (۴ وږی ۱۴۰۴) د حکومت د اطلاعاتو او رسنیو په مرکز کې د یوې خبري ناستې پر مهال، د اسلامي امارت د مشرتابه له لوري د افغانستان د پراختیایي تګلارې د منظورۍ په اړه معلومات له رسنیو سره شریک کړل.
محترم مجاهد په دې ناسته کې وویل: د افغانستان پراختیايي تګلاره د داخلي ظرفیتونو او منابعو څخه په استفادې د هېواد د لویو او اساسي موخو ترلاسه کولو لپاره ترتیب او د عالیقدر امیرالمؤمنین حفظه الله تعالی د حکم په اساس منظوره شوه، چې دغه تګلاره هغه جامع، واحد او اوږدمهاله سند دی چې د راتلونکو پنځو کلونو لپاره د هېواد د بنسټیزو موخو د ترلاسه کولو په پار چمتو او ټولې امارتي سرچینې په یو واحد مسیر رهبري کوي.
محترم مجاهد زیاته کړه، یاده تګلاره د ا.ا.ا د موخو د تحقق لپاره د ټولو وزارتونو او ادارو شته سرچینې او فعالیتونه منسجموي.
د معلوماتو له مخې دغه سند درې اصلي رکنونه لري، چې د اقتصاد او کرنیزو چارو، د طبیعي سرچینو او انرژۍ، د استوګنې او ټولنیزې همغږۍ، د ترانسپورټ او مخابراتو، د دیني او عصري پوهنې او کلتوري چارو، د روغتیا، د ټولنیز خوندیتوب او چاپېریال ساتنې سکتورونه پکې شامل دي او د لومړیتوب وړ ۱۵ برنامې هم لري.
د شرعي قانون واکمنۍ او د اسلامي ټولنیز عدالت د تامین برنامه، د ښې حکومتولۍ او نړیوالو اړیکو د لومړیتوب وړ برنامه، د عامه سکتور د اصلاح، روڼتیا او حساب ورکونې برنامه، د سیمیزو او نړیوالو اړیکو د پياوړتیا او پراختیا برنامه، د امنیت ټینګښت او عامه نظم او سرحدونو ساتنې د لومړیتوب برنامه، د قانون تنفيذ، له جرمونو سره د مبارزې او د محلي حکومتولۍ د پیاوړتیا برنامه، د ښاري پراختیا او کلیوالي پرمختګ برنامه، د اقتصادي او ټولنیزې پراختیا رکن د لومړیتوب وړ برنامه، د طبیعي سرچینو د اغېزناکې، پایدونکې ګټې اخیستنې او د انرژۍ د تامین برنامه، د کرنې او مالدارۍ د پراختیا برنامه، د مالي مدیریت ښه والي او د بریښنايي تادیاتو پراختیا برنامه، د روغتیايي خدمتونو ښه والي او د خوړو خوندیتوب برنامه، د پوهنې، بشري سرچینو او کلتوري پراختیا برنامه، د مخابراتو او معلوماتي ټیکنالوژۍ د پراختیا برنامه او د ترانسپورت او ترانیزیتي زېربناوو د پراختیا برنامه؛ د دغه سند له کلیدي برنامو څخه دي.
د افغانستان د اسلامي امارت ویاند ټینګار وکړ چې دغه سند ځانګړی اهمیت لري، ځکه چې د هېواد د پراختیایي لیدلوري په ټاکلو سره د راتلونکو پنځو کلونو ستر اهداف او لومړیتوبونه روښانوي، د پراختیایي چارو د مدیریت لپاره یو واحد چتر رامنځته کوي، سرچینې په اغېزناک ډول وېشي، د ادارو فعالیتونه یوځای او منسجموي، د هېواد د بنسټیزو اهدافو په چوکاټ کې د خصوصي سکتور چارې تنظیموي او په ټول هېواد کې د متوازن انکشاف د اسانتیا لامل کېږي.
محترم مجاهد د خپلو خبرو په پای کې خلکو ته ډاډ ورکړ، چې د دغه اوږدمهاله سند په تطبیق سره به، غوره پایلې تر لاسه کړي او بنسټیزو موخو ته د رسېدو لپاره به د یو منظم چوکاټ له مخې په تدریجې توګه اغېزناکې کړنې هم ترسره شي.#
