مولوي ذبیح الله مجاهد: د ریاست الوزرا مقام لخوا زلزله ځپلو ته د عاجلې رسیدنې په موخه زر لکه افغانۍ ځانګړې شوي دي
2025-09-01
په هغه خبري ناسته کې چې د روان کال د وږي په ۱۰مه نیټه، د حکومت د اطلاعاتو او رسنیو په مرکز کې ترسره شوه، د افغانستان اسلامي امارت ویاند، محترم مولوي ذبیح الله مجاهد د تېرې شپې د زلزلې وروستي جزئیات له رسنیو سره شریک کړل.
د دې ناستې په پیل کې، محترم مولوي ذبیح الله مجاهد، د زلزلې له امله د افغانانو د شهادت او زیانونو په اړه د اسلامي امارت د تسلیت پیغام ولوست.
په دغه پیغام کې، شهیدانو ته د جنت الفردوس، ټپیانو ته د عاجلې شفا او خپلوانو ته یې د جمیل صبر غوښتنه شوې. دغه راز د اسلامي امارت اړوندو ارګانونو ته سپارښتنه شوې، چې د شته امکاناتو څخه په استفادې د زیانمنو هېوادوالو مرستې ته ور ودانګي.
محترم مولوي ذبیح الله مجاهد وویل: د ریاست الوزرا مقام لخوا پيښې ته د ښې رسېدنې لپاره د کلیو د بیارغونې او پراختیا وزیر، محترم ملا محمد یونس اخندزاده په مشرۍ او د اړوندو ارګانونو د مسئولینو په غړیتوب، یوه ځانګړې کمېټه جوړه شوه. همدازار، زیانمنو ته د عاجلې رسیدنې لپاره د ریاست الوزرا مقام لخوا زر لکه افغانۍ ځانګړې شوي او د اړتیا په صورت کې به نورې پیسې هم ورکړل شي.
د نوموړي په وینا، د کورنیو چارو، ملي دفاع او عامې روغتیا وزارتونو، د یادو ولایتونو د واليانو او اړوندو ادارو له لوري د شهیدانو د راایستلو، د ټپیانو د لېږد، د لومړنیو خوراکي او طبي توکو او نورو اړینو وسایلو د رسولو په برخه کې لازم اقدامات ترسره شوي دي.
د دې خبري ناستې په ترڅ کې، د اسلامي امارت ویاند له ټولو خیریه بنسټونو، سوداګرو او عامو افغانانو څخه غوښتنه وکړه چې له زلزله ځپلو هېوادوالو سره مرسته وکړي او په دې سختو شرایطو کې د هغوی لاس نیوی وکړي.
په پای کې، نوموړي ټینګار وکړ، چې د مرستو د ښه تنظیم لپاره ټولې مرستې باید د ټاکل شوې کمېټې لخوا تنظيم شي او مرسته کوونکي بنسټونه او هېوادوال دې هم خپلې مرستې د یادې کمېټې له لارې ترسره کړي.#
