د ازموینو عمومي ادارې: د ۱۴۰۵ کال کانکور پایلې اعلان شوې؛ څه باندې ۴۹ زره تنه لوړو او نیمه لوړو زده کړو ته بریالي شول
2026-07-12
د ازموینو عمومي ادارې: د ۱۴۰۵ کال کانکور پایلې اعلان شوې؛ څه باندې ۴۹ زره تنه لوړو او نیمه لوړو زده کړو ته بریالي شول
د چنګاښ ۲۱مه، کال ۱۴۰۵
د حکومت د اطلاعاتو او رسنیو په مرکز کې جوړو شوو مراسمو کې، د ۱۴۰۵ کال کانکور هغو لسو ممتازو او بریالیو داوطلبانو ته ډالۍ ورکړل شوې، چې په دې ازموینه کې یې لوړې نمرې ترلاسه کړې وې.
په یادو مرامسو کې، مسئولینو د دغو ممتازو زدهکوونکو بریاوې د هېواد د علمي پانګې د پیاوړتیا او د ځوان نسل د روښانه راتلونکي مهمه نښه وبلله او ټینګار یې وکړ چې د استعدادونو هڅونه او ستاینه د علم، نوښت او پرمختګ لپاره اغېزناک ګام دی.
د ازموینو عمومي ادارې د معلوماتو له مخې، د ۱۴۰۵ کال کانکور ازموینه د هېواد په کچه په منظم، پراخ او څلور پړاویز بهیر کې ترسره شوه، چې نږدې ۱۲۰ زره داوطلبانو پکې ګډون کړی و.
د یادې ادارې د معلوماتو له مخې، د کانکور د پایلو پر بنسټ ۴۸ زره او ۸۵ تنه لوړو زده کړو او یو زر او ۷۸۹ تنه نیمه لوړو زده کړو ته بریالي شوي دي.
د ازموینو عمومي ادارې زیاته کړه، په سږني کانکور کې د هېواد د بېلابېلو قشرونو د ګډون زمینه هم برابره شوې وه؛ نږدې ۲۰۰ خارجمرز او نږدې ۷۰ د اقوامو او قبایلو داوطلبانو په ازموینه کې ګډون کړی، چې د زدهکړو د فرصتونو د پراخوالي څرګندونه کوي.
د یادې ادارې په وینا، د ۱۴۰۵ کال کانکور ازموینه په څلورو ژبو؛ پښتو، دري، عربي او انګلیسي واخیستل شوه. د انګلیسي ژبې په برخه کې ۸۲ داوطلبانو ازموینه ورکړه، چې د ازموینو د معیاري کولو او د ګډونوالو د اړتیاوو د پوره کولو لپاره د ادارې د هڅو څرګندونه کوي.
