د اهل تشیع له یو شمېر علماؤ او مخورو سره د ریاست الوزراء اداري مرستیال کتنه
2025-02-20
د افغانستان اسلامي امارت د ریاست الوزراء اداري مرستیال محترم مولوي عبدالسلام حنفي د اهل تشیع له یو شمېر علماؤ او مخورو سره وکتل.
د دې کتنې په پیل کې محترم حاجي محمد امیر باذل او محترم سید حیات الله عالمي د نورو په استازولۍ په خپلو خبرو کې د اهل تشیع د اجتماعي وضعیت په اړه معلومات ورکړل.
دوی وویل، اهل تشیع د اسلامي امارت په اړه مثبت او ښه نظر لري او له اسلامي نظام هراړخیز ملاتړ کوي.
یادو علماؤ او مشرانو د کاري فرصتونو او انکشافي چارو ایجاد ته په اشارې د اسلامي امارت له مسؤلینو وغوښتل چې دغو برخو ته ځانګړې پاملرنه وکړي.
وروسته د ریاست الوزراء اداري مرستیال محترم مولوي عبدالسلام حنفي له دوی سره پر کتنې خوښي څرګنده کړه وې ویل، د اسلامي امارت مسؤلین، خلکو ته خدمت او د دوی ستونزو ته رسیدګي خپل مسؤلیت او ویاړ ګڼي.
د ریاست الوزراء اداري مرستیال د خلکو او نظام تر منځ د پیاوړې رابطې په ایجادولو کې د علماؤ او مخورو رول مهم وباله او له دوی یې وغوښتل چې په ذکر شوې برخه کې تر بل هر وخت زیاته هڅه وکړي.
محترم مولوي عبدالسلام حنفي د خپلو خبرو په پای کې څرګنده کړه، اسلامي امارت د افغانستان وداني او پرمختګ ته ژمن دی او په عادلانه ډول په ټول هیواد کې د خپل توان مطابق انکشافي برنامې عملي کوي.#
