د افغانستان اسلامي امارت؛ له متوازن پرمختګ او ټولنیز نظم تر فعالې ډیپلوماسۍ پورې
د افغانستان اسلامي امارت؛ له متوازن پرمختګ او ټولنیز نظم تر فعالې ډیپلوماسۍ پورې
د تېرې اونۍ د وروستيو پرمختګونو لنډیز:
په دې وروستیو کې د افغانستان اسلامي امارت په ډیپلوماتیکو اړیکو، بنسټیزو او پرمختیايي پروژو، کرنې، د عامه خدمتونو ښهوالي، او ټولنیز نظم کې یو لړ څرګند اقدامات ترسره کړي دي. دغه اقدامات نه یوازې د کورنیو او نړیوالو اړیکو د پیاوړتیا هڅه څرګندوي، بلکې د خلکو د ژوند د کیفیت د لوړولو او د امنیت د تأمین هڅه هم په ډاګه کوي.
په ډیپلوماتیکه برخه کې، د ریاست الوزراء اداري مرستیال، محترم مولوي عبدالسلام حنفي د ترکیې له سفیر جنک اونال او د هغه له ملګرو سره لیدنه د افغانستان او ترکیې د تاریخي اړیکو او اوږدمهاله همکارۍ څرګنده بیلګه ده. په دې لیدنه کې د اقتصادي همکاریو د پراختیا، د توکو د انتقال اسانتیا، او د سوداګرۍ د اړیکو پر پراختیا ټینګار وشو. دا څرګندوي چې اسلامي امارت د کورني او بهرني پانګونې د ثبات او فرصتونو د رامنځته کولو هڅه کوي.
په کورني ډګر کې، د بنسټیزو پروژو پراخ ملاتړ شوی دی. د لوګر په برکيبرک ولسوالۍ کې د نږدې ۱۰ کیلومتره سړک جوړول، د سرپل–فاریاب ۳۰ کیلومتره لومړنی سړک، او په پکتیا او سمنګان ولایتونو کې د ۲۲۰ پراختیايي پروژو بشپړول د دولت د متوازن ولایتي پرمختګ او د محلي کاري فرصتونو د رامنځته کولو ژمنه څرګندوي. دغه پروژې د خلکو د لاسرسي د ښهوالي، سوداګرۍ د آسانتیا، او په لرو پرتو سیمو کې د خلکو د ژوند د کیفیت د لوړولو لپاره ترسره شوي دي.
د کرنې په برخه کې، د ننګرهار په ولایت کې د مالټې حاصلاتو زیاتوالی او په بدخشان کې د آلوبالو باغونو جوړول د کروندګرو کورنیو د اقتصاد د پیاوړتیا او د غیرقانوني کښت د بدیل د برابرولو مهمې بیلګې دي. دا اقدامات د داخلي تولید د زیاتوالي ترڅنګ، کولای شي د وارداتو پر کمولو او د پایدار اقتصادي ودې په پرمختګ کې ونډه ولري.
د روغتیا په برخه کې، د پنجشیر ولایت د صحي څښاک د اوبو پروژو بشپړول، د داخلي درملو تولید او وېش ملاتړ، د چاپېریال ساتنې موضوعات په اداري پلانونو کې شاملول، لغمان ولایت کې د راستنېدونکو لپاره د نمبرو وېش، او په غور ولایت کې د بېوزلو کورنیو لپاره بشري مرستې، د خلکو د اساسي اړتیاوو د پوره کولو، د روغتیایي ستونزو د کمولو او د ټولنیز هوساینې د ښهوالي هڅې ښيي.
امنیت د پرمختګ لومړنی شرط ګڼل شوی دی. د ریاست الوزرا اداري مرستیال لیدنه له فاریاب ولایت د ځايي مشرانو او مسئولینو سره ښيي چې اسلامي امارت هڅه کوي د ژوند او اقتصادي فعالیتونو لپاره خوندي چاپېریال برابر کړي. سربېره پردې، په تیرو څلورو کلونو کې په خوست کې د شاوخوا ۱۷۰ اوږدمهاله او وژونکو شخړو حل او فصل، چې د ټولنیز امنیت او آرامتیا لپاره جدي ننګونه ګڼل کېده، د اسلامي امارت او قومي مشرانو هڅې د ټولنیز نظم، د اختلافاتو د حل، او د ورورولۍ د فرهنګ د ترویج په برخه کې څرګندوي.
په ټولیز ډول، د اسلامي امارت وروستي فعالیتونه ښيي چې د حکومت سیاست په درې اصلي محورونو لکه: د ډیپلوماسۍ او نړیوالو اړیکو پیاوړتیا د سوداګرۍ او اقتصادي همکاریو د پراختیا لپاره؛ د بنسټیزو پروژو او کلیو د پرمختګ هڅې د خلکو د ژوند د کچې د لوړولو او د کاري فرصتونو د برابرولو لپاره؛ او امنیت، عام نظم او د خدماتو وړاندې کول د اقتصادي او ټولنیز ودې لپاره د پایدار چاپېریال د رامنځته کولو په موخه، ولاړ دی.
د حکومت د اطلاعاتو او رسنیو مرکز
