د افغانستان اسلامی امارت

د ټولنې د اصلاح او د ښځو د حقونو د تأمین په برخه کې عملي ګامونه

د یوې سالمې او باثباته ټولنې د رامنځته کېدو لپاره د ښځو د حقونو خوندیتوب، د شخړو حل، د ناوړه دودونو مخنیوی او د ټولنیز یووالي پیاوړتیا بنسټیز ارزښتونه ګڼل کېږي.

په همدې لړ کې د امر بالمعروف، نهي عن المنکر او د شکایتونو اورېدلو وزارت وروستي فعالیتونه ښيي چې د ټولنې د اصلاح، د کورنیو ستونزو د حل او د اسلامي او ټولنیزو ارزښتونو د پیاوړتیا لپاره عملي اقدامات روان دي.

د ښځو د حقونو اړوند د ۱۳۷ قضیو حل کېدل د پام وړ پرمختګ بلل کېږي. کورنی تاوتریخوالی، د میراث حقونه، غیر شرعي نکاحګانې، ولور، نفقه او د طلاق اړوند ستونزې هغه موارد دي چې د کورنیو د بې ثباتۍ او ټولنیزو ستونزو اصلي لاملونه ګرځي. د دغو قضیو حل نه یوازې د ښځو د شرعي حقونو د تأمین سبب کېږي، بلکې د کورنیو ترمنځ د باور او عدالت فضا هم پیاوړې کوي.

له بلې خوا، د قومي او ژبني تعصباتو پر وړاندې مبارزه او د دښمنیو او شخړو حل د ملي یووالي د ټینګښت لپاره ځانګړی ارزښت لري. د ۱۵ لویو دښمنیو او ۶۹ وړو شخړو حل کېدل دا څرګندوي چې د ټولنیز تفاهم او ورورولۍ د رامنځته کولو لپاره د یاد وزارت له لوري عملي هڅې روانې دي.

همدارنګه، د خرافاتو او ناوړه دودونو پر وړاندې مبارزه د ټولنې د فکري اصلاح مهمه برخه جوړوي. د کوډګرو نیول او عدلي او قضایي ارګانونو ته د هغوی سپارل دا پیغام رسوي چې د خلکو له عقایدو او باورونو څخه ناوړه استفاده د قانون او شریعت په چوکاټ کې په جدي توګه تعقیبېږي.

په ټوله کې، د ښځو د شرعي حقونو تأمین، د شخړو حل، د ناوړه دودونو مخنیوی او د ټولنیز اصلاح لپاره دوامدارې هڅې د یوې هوسا، عادلانه او متوازنې ټولنې د جوړېدو لپاره مهم بنسټونه دي. هر څومره چې دغه هڅې پراخې او منظمې شي، هومره به د ټولنیز ثبات، ملي یووالي او د خلکو د هوساینې لپاره اغېزناکې پایلې ولري.